भांगरभूंय | प्रतिनिधी
मुख्यमंत्री : वेवसायिकांक गरजेची मजत करपाक तयार
भांगरभूंय । प्रतिनिधी
पणजी : सध्या गोंयांतले चडशे वेवसाय हेर राज्यांतल्या व्यक्तींच्या हातांत गेल्यात. गोंयकारपण तिगोवन दवरपाचें आसा जाल्यार गोंयकारांनी परंपरीक वेवसाय करप सोडून दिवचें न्हय. थळाव्या वेवसायिकांक गरजेची ती सगली मजत करपाक सरकार तयार आसा, अशें मुख्यमंत्री डॉ. प्रमोद सावंत हांणी सांगलें. ग्रामीण विकास खात्या वतीन आयोजीत जी फूड कार्यावळींत ते उलयताले. ह्या वेळार आमदार डॉ. देविया राणे, दीपाली नायक, संजय आमोणकार, डॉ, संगम पाटील उपस्थीत आशिल्ले.
मुख्यमंत्र्यान सांगलें, सध्या फकत नुस्तें उद्देग वेवसायांत थळावे लोक आसात. ते ह्या वेवसायांत कायम उरचे हे खातीर आमी खात्या वतीन नव्यो येवजण्यो हाडपाचो विचार करतात. ह्या वेवसायांतल्यान लेगीत थळावे लोक भायर सरले जाल्यार आनीक कांय दिसांनी आमकां बाजारांत हिंदी भाशेंतूच उलोवचें पडटलें. सरकारा वतीन थळाव्या वेवसायिकांक गरजेचें कुशळटाय उदरगत प्रशिक्षण, अर्थीक अनुदान, उत्पादनाचें मार्केटींग हातूंत मजत केल्या. हाचो सगल्यांनी फायदो करून घेवपाक जाय. आयज कोरियन खाद्यपदार्थ संवसारांत सगल्याक फामाद आसात. ते खातीर कोरिया देशान आदीं स्वता पसून सुरवात केल्ली. थंयच्या लोकांनी आपले खाद्य संस्कृतीक उर्बा दिली. ल्हवू ल्हवू कोरियन खाद्यपदार्थ संवसारभर फामाद जाले. गोंयांतल्या खाद्यपदार्थांत अशीच तांक आसा. पेडणें सावन काणकोण मेरेन वेगवेगळे रुचीक पदार्थ तयार करतात. परंपरीक पद्दतीन तयार केल्ले अशे खाद्यपदार्थ रुचीक तशेंच भलायकेक फायद्याचे आसतात. आमी लेगीत स्वताच्या खाद्यपदार्थांक उर्बा दिली जाल्यार ते संवसारीक पांवड्याचेर पावतले.
‘राजकी हेतून विरोध नाका’
महिला आरक्षण विधेयक लोकसभेंत मंजूर जातली अशी आमकां खात्री आसा. विरोधकांक जाय जाल्यार तांणी विधेयक मंजूर जावपाचें स्रय स्वता कडेन घेवचें, मात हाका राजकी हेतून विरोध करचो न्हय, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
