भांगरभूंय | प्रतिनिधी
पणजीः राष्ट्रीय परशुराम परिषद गोंय विभाग आनी म्हायती आनी प्रसारण खात्यान पणजेंत गोमंत जनक भगवान परशुराम अवतरण महोत्सव आयोजीत केला. गोंय मनरिजवण संस्था मुखार आशिल्ल्या परशुराम पुतळ्याच्या वाठारांत 19 ते 26 एप्रील मेरेन हो महोत्सव जातलो अशी म्हायती परिशदेचे प्रेमपाल सिंग हांणी दिली. शेनवारा पणजेंत जाल्ले पत्रकार परिशदेंत ते उलयताले. ह्या वेळार गजेंद्र सिंग राजपूत, प्रेम पाल सिंग, डॉ. अमित नगर, महेश कांदोळकार हाजीर आशिल्ले.
सिंग हांमी सांगलें, गोमंतक जनक भगवान परशुराम हांच्या जयंती निमतान हो उत्सव मनयतात. फाटलीं जायतीं वर्सां आमची परिशद देशभरांत काम करता. गोंयची निर्मिती भगवान परशुराम हांणी केल्ली. देखून हांगाय हो महोत्सव घडोवन हाडपाचें आमी थारायलां. हाचे आदीं आमी परशुराम संबंदीत गोंयांतल्या वेगवेगळ्या सुवातींक भेट दिल्या. महोत्सवा वेळार 19 तारखेक परशुराम पुतळ्यांतल्यान कलश यात्रा काडटले. हाचे उपरांत सांस्कृतीक कार्यावळी जातल्यो. हाचे उपरांत महाआरती वरवीं ह्या महोत्सवाचें उक्तावण मुख्यमंत्री डॉ. प्रमोद सावंत करतले.
ह्या महोत्सवांत 20 ते 24 एप्रील मेरेन परमपूज्य दिलीप कृष्ण भारद्वाज महाराज हांचे हस्तुकीं भगवान परशुराम कथा वाचन जातले. हातूंत तांचे जिवीत आनी धर्मीक शिकवण सांगतले. हाचे भायर दर दिसा सांजवेळार काशी सावन आयिल्ल्या पुजाऱ्यांची महाआरती जातली. हाचे भायर दर दिसा परशुरामाचे मूर्तीचेर उजवाड आनी ध्वनी आदारीत कार्यावळ जातली. हातुंतल्यान तांच्या वावराची आनी शिकवणेची वळख जातली. सप्तक भर पूजा, सांस्कृतीक आनी भक्तीमय कार्यावळी आयोजीत करतले. 26 एप्रीलाक ह्या महोत्सवाची सांगता जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
