भांगरभूंय | प्रतिनिधी
मडगांव: वेळ्ळी वाठारांत बेवारशी सुण्याचेर उकळिल्लें उदक उडोवपाचो प्रकार सीसीटीव्ही फुटेजींतल्यान मुखार आयिल्लो. ह्या प्रकरणांत दक्षीण गोंय प्राणी क्रुरता प्रतिबंधक समिती कडल्यान कुंकळ्ळी पुलिशेंत कागाळ नोंद केल्ली. ते प्रमाण कुंकळ्ळी पुलिसांनी दुबावीत लेस्ली रांगेल हाचे आड गुन्यांव नोंद केला.
मेळिल्ले म्हायती प्रमाण, वेळ्ळेंतल्या कारशेत वाठारांत बेवारशी सुण्याचेर उकळिल्लें उदक रकोवन ताका गंभीर जखमी करपाची घडणूक घडिल्ली. 3 एप्रील दिसा सकाळीं 10.15 वरांच्या सुमाराक कारशेत वेळ्ळे दुबावीत लेस्ली रांगेल हाणें ब्रुटस नांवाच्या एका बेवारशी सुण्याचेर मुद्दाम उकळिल्लें उदक ओतलें.
हाका लागून सुण्याच्या आंगा वेले केंस लासून गेले. ताच्या कानाक आनी कातीक गंभीर जखमो जाल्यो. ह्या प्रकरणांत लेस्ली हाच्या शेजाऱ्यांनी दक्षीण गोंय जिल्हो प्राणी क्रुरता प्रतिबंधक संस्थे कडेन संपर्क सादलो. प्रतिनिधी राज प्रतीक हांणी सीसीटीव्ही फुटेज आनी हेर मेळिल्ल्या म्हायतीच्या आदारान कुंकळ्ळी पुलीस स्टेशनार कागाळ नोंद केल्या. हे कागाळी वेल्यान पुलिसांनी दुबाविता आड गुन्यांव नोंद केला. पुलीस उपनिरिक्षक सुहास वेळीप ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
