भांगरभूंय | प्रतिनिधी
दोडामार्ग: सिंधुदुर्गांतल्या दोडामार्गाच्या विर्डे गांवांतलो ‘वजरा सकला’ घसघसो पर्यटकांक जितलो आकर्शीत करता तितलोच तो तें वाठाराची वळख नाशिल्ल्या लोकां खातीर धोक्याचो थारुं येता आनी हाचो प्रत्यक्ष अणभव गोंयच्या पांच विद्यार्थ्यांक आयलो. भोंवडेचो आस्वाद घेवपाक गेल्ले हे पांचूय विद्यार्थी परत येवपाची वाट विसरून दाट रानांत आडकले. ही सुवात साबार रानवटी जनावरां हांची रावपाची सुवात आसा. वट्ट चार वरां ते मरणाच्या दारांत आडकून उरले. पूण पुलिसांच्या बेगोबेगपणाक लागून आनी थळाव्यांच्या सहकार्याक लागून सगळे जाण सुखरुप परतले.
फोंडेंचे चार तरणाटे आनी एक तरणाटी मेळून वट्ट पांच जाण विर्डेंतलो ‘वजरा सकला’ घसघसो पळोवपाक आयिल्ले. सैमाच्या सांगतान दीस काडले उपरांत तांणी सांजवेळा उसरां परतीचो प्रवास सुरू केलो. पूण काळोख जाल्ल्यान आनी रानांतले सगळेच रस्ते एकसारके दिसपाक लागले तेन्ना हें पांचूय विद्यार्थी मुखेल रस्तो सोडून रानांत भितर शेणले. अस्वल, वाग, कोल्हे ह्या सारकी रानटी जनावरांचो वावर, ल्हवू ल्हवू मोबायलाचो नेटवर्क गायब जावप आनी ल्हवू ल्हवू आजून काळोख जावप हाका लागून विद्यार्थ्यांच्या मनांत भंय भरलो.
परिस्थिती हाता भायर गेली तेन्ना तांणी निमाणो उपाय म्हणून नेटवर्क सोदून सांजेच्या सुमार 7:15 वरांचेर ‘112’ ह्या आपत्कालीन क्रमांकाचेर संपर्क केलो. हो कॉल नागपूर नियंत्रण कक्षांत लागलो. ते उपरांत तांणी बेगोबेग ही म्हायती सिंधुदुर्ग पुलिसांक दिली. दोडामार्ग पुलीस निरिक्षक हेमचंद्र खोपडे हांच्या मार्गदर्शना खाला बायल पुलीस नायक मानसी गावडे आनी पुलीस हवालदार बाळकृष्ण गावस रोखडेंच विर्डें गांवांत पावले. पूण फुडें वचपाक वाहनाक मार्ग नाशिल्ल्यान पुलिसां खातीर हें एक व्हड आव्हान आशिल्लें. पुलिसांनी थळाव्यांच्या आनी तळेखोल पुलीस पाटील हांचे पुताची मजत घेवन चलत सोद मोहीम सुरु केली.
हातांत टॉर्च आनी मनांत जिद्द घेवन पुलीस आनी थळाव्यांचो पंगड रानांत भितर सरलो. दुसरे वटेन हे विद्यार्थी भियेवन, एके न्हंयंचे देगेर मजतीची वाट पळयत आशिल्ले. रातच्या सुमार 10:45 वरांचेर रानांत पुलिसांच्या उल्याचो आवाज आयलो तेन्ना विद्यार्थ्यांच्या जिवात जिव आयलो. ते पांचूय विद्यार्थी ‘वजरा सकला’ रानांत न्हंयेचे देगेर बशिल्ले मेळ्ळे. पुलिसांनी तांकां धीर दिलो. तांकां खूब जतनायेन रानांतल्यान भायर हाडून सुरक्षीत सुवातेर व्हेले.
सध्या गोंयांत आनी हेर कडेन उश्णताय वाडल्या. ते खातीर विसव आनी थाकाय घेवपाक लोक अशा सुवातींचेर येतात. विर्डेंचे रान रानवटी जनावरांचें सैमीक रावपाचें थळ आशिल्ल्यान सांजवेळा उपरांत पर्यटकांनी थंय रावप धोक्याचें थारता. हे मोहिमेत दोडामार्ग पुलिसांनी दाखयल्ली तत्परता आनी थळाव्यांनी केल्ली मजत हाका लागूनच हे पांचूय विद्यार्थी सुखरुप घरां पावले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
