भांगरभूंय | प्रतिनिधी
काणकोण: काणकोण भलायकी केंद्रा वतीन पातळपी दुयेंसां संबंदी जागृताय करतनाच दीसवड्याचेर कामाक वचपी गोंया भायल्या कामगारांच्या रगताचे नमुने घेतले.
काणकोणां सुमार 700 परस चड गोंया भायले कामगार दीसवड्या वेल्या कामाक वतात आनी ते काणकोण रवींद्र भवना कुशीक एकठांय जमतात. तांच्या रगताची तपासणी करपा खातीर हास्पिटलाचे नितळसाण निरिक्षक प्रणय नायक आनी तांच्या पंगडान सकाळीं 8 वरांचेर रवींद्र भवना कुशीक कामगारांच्या रगताचे नमुने घेतले. पूण फक्त 53 कामगारांच्या रगताचे नमुने घेवंक मेळ्ळे जाल्यार हेर कामगारांनी नमुने दिवपाक विरोध केलो. जाल्यार कांय जाण थंयच्यान हेर कडेन पळून गेले.
गोंया भायल्या कामगारांच्या रगताचे नमुने घेत जाल्यार आनी कामगारांक मलेरिया, डेंग्यू वा चिकुनगुनिया जाल्लो आसत जाल्यार ताचेर उपचार करपाक मजत जाता. पूण कामगारांचें सहकार्य मेळना. हे खातीर जे कामगार भाडेकार म्हूण आपलें वळखपत्र काणकोण पुलीस स्टेशना कडल्यान मेळयतात ताचे पयलीं भलायकी कार्ड करून घेवपाची सक्ती पुलीस निरिक्षकान करची अशी मागणी करपी चार पत्रां काणकोण पुलीस स्टेशनार दिल्लीं. जेणे करून पावसांत उप्रासपी दुयेंसांचेर नियंत्रण दवरपाक सोंपें जातलें. पूण काणकोण पुलीस स्टेशनान लेगीत कसलेंच सहकार्य करूंक नाशिल्ल्याचें सेनिटरी निरिक्षक प्रणय नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
