भांगरभूंय | प्रतिनिधी
मार्केटांत बेकायदो गजालींक उर्बा दिवपाचें पालिका मंडळांनी आरंभलां सत्र
भांगरभूंय । प्रतिनिधी
म्हापशें: म्हापशेंचें पालिका मार्केट हें फाटल्या कितल्याशाच वर्सां सावन पालिका मंडळाचें चरपाचें कुरण जालां. शारा सयत ह्या मार्केटांत बेकायदो गजालींक उर्बा दिवपाचें सत्रूच पालिका मंडळांनी आरंभलां.
आवांताद अशा मार्केटांतले रस्ते फुटपाथा वयल्या विक्रेत्यां वरवीं आडावप, सुमारा भायर विक्रेत्यांक सुवात दिवन एके तरेन तांकां ती सुवात विकप, ह्या रस्त्यांचेर गाडे घालप, आडयिल्ल्या फुटपाथांचेर विक्रेत्यांक सामान मांडपाक दिवन अतिक्रमणाक तेंको दिवप, नुतनीकरण करून दुकानांचे मूळ रचनेंत बदल करपाक उर्बा दिवप, अशा बेकायदो गजालींक पालिका मंडळ आनी अधिकारी, कर्मचाऱ्यांनी मेकळीक दिल्या.
ह्या प्रकाराक वेपाऱ्यांचो तितलोच आदार आसा. वेपारीच बेकायदो गजाली करतात ताका लागून पालिका मंडळूय आपलीं बोल्सां भरतात. चडशे दुकानकार फुटपाथा वयल्या विक्रेत्यांक आपल्या दुकानां फुडले काडपाक तयार नात. ह्या विक्रेत्यांचें दुकानांत सामान दवरप आनी मुखार बसोवपाक दिवपाच्या नांवा खाला दुकानकार भाडें घेतात. ही येणावळ बंद जावपाचो भंय आशिल्ल्यान दुकानकारांचो त्या विक्रेत्यांक थंयच्यान काडपाक विरोध आसा.
आतां जाल्यार ह्या विक्रेत्यांनी दुकानकार आनी पालिका मंडळाच्या आशिर्वादान शेड उबारपाक सुरवात केल्या. म्हापशें बाजार ते पॅराडायस फार्मसी मेरेन हो प्रकार चल्ला. आदीं हे विक्रेते वत आनी पावसा पसून आलाशिरो मेळचो हे खातीर सत्र्यांचो वापर करताले. पूण आतां दुकाना भायर बेकायदो तरेन लोखणाच्यो सरयो घालून शेड उबारतात.
सरकारान लेगीत पालिका मंडळाच्या ह्या बेकायदो गजालींक आदारूच केला. नुस्त्यां आनी भाजी मार्केट प्रकल्पा सयत मार्केटाच्या विस्तारीत इमारतींक दोळे धांपून परवानगी दिल्या. सरकाराचे मजतीन उबारिल्लें नुस्त्यां मार्केट 15 वर्सां भितरूच मोडपाक पावली. ते उपरांत उबारिल्ल्या नुस्त्यां मार्केटांत अजून मेरेन नुस्तें विकप्यांक बसपाची योग्य वेवस्था करूंक ना. ते भायर ह्या मार्केटांत घाणयारें उदकाक वचपाची वेवस्था करूंक ना. मांस विक्रेत्यांचीय ह्या प्रकल्पांत सुवात दिवंक ना. इमारतीच्या दुसऱ्या माळ्याचें बांदकामूय अर्दवट स्थितींत सोडलां.
भाजी मार्केट बांदतना लेगीत नियोजनाचो उणाव आसा. हें मार्केट बांदतना विक्रेत्यांचो नियाळ घेवंक ना. तशेंच मार्केट पुराय जाले उपरांत पालिका मंडळान आपले मर्जींतल्या नव्या भाजी विक्रेत्यांक थंय भरले. ताका लागून ह्या मार्केटाचे भोंवतणी विक्रेत्यांची जात्राच भरता.
नुस्त्यां आनी भाजी मार्केट प्रकल्प सरकाराच्या गोंय नागरी विकास एजन्सी वतीन बांदल्यात. ह्या दोनूय प्रकल्पांचें बांदकाम करतना नियोजनाचो उणाव आसा. सध्याचो तशेंच फुडारांतलो दिश्टीकोन दवरून हें प्रकल्प बांदूंक नात. ते भायर पालिका मंडळाच्या बेकायदो प्रकारांक लागून हे दोनूय प्रकल्प धवो हती थारल्यात.
ह्या दोनूय मार्केटांनी विक्रेत्यांक आस्पावन घेवप, फळ विक्रेत्यांचें स्थलांतर करप तशेंच मसालो विक्रेत्यांचेर कारवाय करपाच्या नांवा खाला केल्ले अर्थीक भानगडीक लागून फाटलें पालिका मंडळ चर्चेंत शिल्लें. पे पार्किंगच्या नांवा खाला बाजारांत येवपी लोकांक आनी सुवात दिवपाच्या नांवा खाला सदांच्या विक्रेत्यांक वेठीक धरतात. चणेंकारांचीं दुकानां आनी भाजी मार्केटा भोंवतणी मार्केट इमारतीचेर पयल्या माळ्याचें बांदकाम केलां. तशेंच 108 दुकानांचेर पयल्या माळ्याचेर दुकानां बांदल्यात. पूण तीं दुकानां अजून बोलीदारांचे सुवादीन करूंक नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
