भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिकेच्या पोरणे इमारतीचें नूतनीकरण करून तातूंत आथाईद लायब्ररी सुरू करपाचो निर्णय पालिका मंडळान घेतला. नूतनीकरणाच्या कामाक 14 ऑगस्टाच्यान सुरवात करतले. गोंय राज्य नागरी सुविधा उदरगत एजन्सी (जीसुडा) वतीन हें काम करतले. ते खातीर सुमार 3.80 कोटी रुपया खर्च येतलो.
हें काम गोंय विधानसभा वेंचणुकेच्या आचार संहितेक लागून फुडें धुकलचें पडिल्लें. इमारत नूतनीकरणा सयत लायब्ररीचो रचणूक देशांतल्या बऱ्या लायब्ररीं प्रमाण करतले. विद्यार्थी आनी वाचकांक थंय आर्विल्ल्यो सुविधा उपलब्द करून दिवपाचें पालिका मंडळान थारायलां. इमारत मोडपाचे स्थितींत आशिल्ल्यान 2019 वर्सा आथाईद लायब्ररी वाचकां खातीर बंद केल्ली. ही लायब्ररी आदल्या पालिका मंडळान कला आनी संस्कृती खात्याचे सुवादीन करपाचो निर्णय घेतल्लो.
जाता तितले बेगीन इमारत नूतनीकरणाचें काम करून थंय लायब्ररी सुरू करतले अशी म्हायती नगराध्यक्ष शुभांगी वायंगणकारान दिली. लायब्ररी बंद आशिल्ल्यान वाचकांची गैरसोय जाता ही गजाल पालिका मंडळाक खबर आसा ताका लागून नूतनीकरणाक प्राधान्य दितले अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
