भांगरभूंय | प्रतिनिधी
आयच्या डिजिटल युगांत इंटरनेट आनी संपर्क यंत्रणा हांचें म्हत्व साद्या मनशाकूय कळूंक लागलां. 5G तंत्रज्ञानाचो आमी वापर करपाक सुरवात केल्याच, थंयच आतां 6G तंत्रज्ञानाची चर्चा सुरू जाल्या. 6G तंत्रज्ञान हो फक्त 5G चो फुडलो पांवडो नासून ही एक पुराय वेगळी क्रांती आसा. भारत आयज ह्या बदला खातीर सज्ज जाला व्हय? 6G चो प्रभाव भारताचेर कसो पडटलो, हें समजून घेवप गरजेचें आसा.
आयआयटी (IIT) हैदराबाद: क्रांतीचो उगम
भारताच्या तंत्रज्ञानाचेर आमी गर्व करूंक जाय, भारताच्या आयआयटी (IIT) हैदराबादच्या संशोधकांनी 6G तंत्रज्ञानाच्या मळार संशोधनांत मोलाचें योगदान दिलां. भारताच्या आयआयटी हैदराबादच्या तज्ञांनी आनी अभियंत्यांनी ह्या तंत्रज्ञाना खातीर लागपी ‘पॅटंट’ आनी ‘प्रोटोकॉल’ तयार केल्यात. आमच्या अभियंत्यांनी फक्त परदेशांतल्या तंत्रज्ञानाचेर आदारून रावनासतना स्वताच्या तांकीन ही नवी यंत्रणा विकसीत केल्या. आमचे अभियंते आयज संवसारीक तंत्रज्ञानाचें फुडारपण करपा खातीर तयार आसात ही आमकां भारतीयां खातीर व्हड आभिमानाची गजाल आसा.
6G तंत्रज्ञान आनी भारताची गती
6G तंत्रज्ञान हें ‘टेराहर्ट्झ’ (Terahertz) फ्रिक्वेन्सीचेर आदारीत आसतलें, जाका लागून डेटा ट्रान्सफर करपाचो वेग 5G परस 100 पटीन चड आसतलो. हें तंत्रज्ञान जें काम आतां सेकंदांत जाता, तें मिलिसेकंदांत करपाची तांक दवरता. भारताचो फुडार हो डिजिटल बुन्यादीचेर आदारून आसतलो. 6G तंत्रज्ञान आयिल्ल्यान भारतांतलीं कृशी, भलायकी आनी शिक्षण आनी हेर मळां पुरायपणान बदलतलीं.
भलायकी सेवें खातीर, 6G च्या आदारान तज्ञ डॉक्टर दुर्गम वाठारांत आशिल्ल्या दुयेंतींची शस्त्रक्रिया पयशिल्ल्यान लेगीत अप्रत्यक्षपणान करूंक शकतले. शिक्षणा खातीर, आभासी वास्तवां (Virtual Reality) वरवीं शिकप हें घरां बसून शक्य जातलें. शेतकी क्षेत्रांत, 6G च्या आदारान पिकांचेर लक्ष दवरप आनी हवामानाची अचूक म्हायती मेळप सोंपें जातलें. येरादारी, यंत्रस्वचलन, राखण, प्रशासन सारकिल्ल्या साबार मळांचेर क्रांती घडोवन हाटले.
6G तंत्रज्ञानाची विक्रमी संद आनी निर्यात
भारत आतां फक्त 6G तंत्रज्ञान वापरपी देश उरचो न्हय, तो हें तंत्रज्ञान विकसीत करपी ‘केंद्र’ (हब) जावंक शकता. 6G तंत्रज्ञान आमी जगाक विकूंक शकतात. ज्या देशां कडेन ही तंत्रीक तांक ना, तांकां भारत आपलो आदार आनी तंत्रज्ञान पुरवण करूंक शकता. हाका लागून भारताच्या तंत्रज्ञान क्षेत्रांत रोजगाराचीं लाखांनी नवीं दारां उगडटलीं. भारत आतां ‘तंत्रज्ञान सिवकारपी’ देशा सावन ‘तंत्रज्ञान पुरवणदार’ जावपाचे दिशेन पावल उखलता.
आव्हानां आनी आमची जबाबदारी
6G च्यो सुखदिण्यो गजाली आमी पळयतात पूण तें राबोवपा खातीर व्हड प्रमाणांत इन्फ्रास्ट्रक्चरची गरज आसा. आमी हें तंत्रज्ञान विकपाच्या संदर्भांत ‘सॉफ्टवेर’ आनी ‘हार्डवेर’ ह्या दोनूय मळांचेर काम करूंक जाय. भारताच्या तरणाट्यांनी आतां हाचे खातीर सज्ज जावप गरजेचें आसा.
6G तंत्रज्ञान ही भारता खातीर एक व्हड संद घेवन आयल्या. आयआयटी हैदराबादच्या आमच्या तज्ञांनी केल्लें संशोधन भारताची कुशळटाय आतां जगांतल्या खंयच्याय देशा कडेन धिरी घेवपाक सज्ज आसा हे सिद्द करता. तंत्रज्ञानाच्या ह्या नव्या युगांत आमी पयलें पावल उखलपा खातीर आतां सज्ज आसात. 6G तंत्रज्ञान भारताच्या अर्थवेवस्थेक एक नवी उंचाय दिवपाक तयार आसा. भारत ‘डिजिटल इंडिया’ सावन ‘जागतीक तंत्रज्ञानाची महाशक्त’ जावपाचे दिशेन नेटान पावलां उबारता. भारताचो तंत्रज्ञानीक फुडार निचिछ्तूच पर्जळीत आसा हें आमी खात्रेन म्हणपाक शकतात.
प्रा. जयेश अर्जून राऊत
8329426896
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
