गोंयांत वॉटर मॅट्रो प्रकल्पाची प्रक्रिया पयल्या पांवड्यारः सोनोवाल

भांगरभूंय | प्रतिनिधी

बंदर कप्तान खात्याची इमारत, टर्मिनलाचे सोनोवाल हस्तुकीं उक्तावण

पणजीः गोंयां खातीर वॉटर मॅट्रो प्रकल्प मंजूर करपाची प्रक्रिया निमण्या पांवड्यार आसली. मात मुख्यमंत्री डॉ. प्रमोद सावंत हांचे मागणे उपरांत ही प्रक्रिया पयल्या पांवड्यार घातल्या. तशेंच मुरगांव बंदर प्राधिकरणांत (एमपीए) केंद्र सरकार 2 हजार कोटी रुपयांच्या प्रकल्पांची अंमलबजावणी करतलें, अशी घोशणा केंद्रीय जहाज, जलमार्ग आनी बंदर मंत्री सर्बानंद सोनोवाल हांणी केली.

बंदर कप्तान खात्याच्यो नव्यो इमारती आनी टर्मिनालाचें सोनोवाल हस्तुकीं उक्तावण जालें. ह्या वेळार मुखेल सोयरे म्हण ते उलयताले. तशेंच माचयेर मुख्यमंत्री डॉ. प्रमोद सावंत, केंद्रीय मंत्री श्रीपाद नायक, बंदर कप्तान मंत्री दिगंबर कामत, न्हंय येरादारी मंत्री सुभाष फळदेसाय, राज्यसभा खासदार सदानंद शेट तानावडे, जीएसआयडीसी चेअरमन आनी कळंगुटेचे आमदार मायकल लोबो, मुरगांवचे आमदार संकल्प आमोेणकार, एमपीएचे चेअरमन एन विनोदकुमार आनी बंदर कप्तान ओक्टाव्हियो रॉड्रीग्स हजर आशिल्ले.

उक्तावणा वेळार उलयतना सोनोवाल हांणी सांगलें, अंतर्गत जहाज कायदो 2021 ची अंमलबजावणी करपी गोंय हें देशांतलें पयलें राज्य थारलां. तशेंच प्रस्तावीत मॅरीटायम बोर्ड, गोंय जहाज दुरूस्ती आनी बांदणी धोरण आनी सर्वसमावेशक मास्टर प्लॅन हें राज्याचें मॅरीटायम फुडाराचें स्पश्ट चित्र दाखयता.

गोंयां वॉटर मेट्रो प्रकल्प जो निमण्या पांवड्यार आसलो तो आतां अंमलबजावणे पयल्या पांवड्यार हाडून प्राध्यानान हातांत घेतलां. कांय दीस पयलीं मुख्यमंत्री हांणी दिल्ली भेट घेवन गोंयांक हो प्रकल्प दिवप सारकें थारतलें अशी मागणी म्हजे कडेन केल्ली. गोंयां खातीर नवी येरादारी वेवस्था तयार करपा खातीर कोची वॉटर मेट्रोच्या धर्तीचेर गोंयांत वॉटर मेट्रोचे येसस्वी अंमलबजावणेक प्रोत्साहन दिवप हें सारकें आसतलें अशें सांगून तांची मागणी मान्य केली, अशें सोनोवाल हांणी म्हणलें.

वर्स 2014 सावन एमपीएन तोखणाय करपा सारकी कामगिरी करून रु. 1300 कोटी परस चड प्रकल्प पुराय केल्यात आनी रु. 2 हजार कोटी परस चड प्रकल्प जशें की बर्थ नं. णवचो पुर्नविकास, नवे नुस्तेमारी हर्बर सयत वास्को बॅ प्रक्लप, कॅपिटल ड्रॅजींग आनी अद्यावत शिपायार्ड क्लब हांची अंमलबजावणी करतले. देशांतलो पयलो हरीत बंदर हो मान घेवन एमपीएन इतिहास नोंद केला, अशी म्हायती सोनोवाल हांणी दिली.

गोंयांत दर दिसा 50 हजार लोक न्हंय मार्गा वरवीं येरादारी करतात आनी रो रो फेरी घातले उपरांत हो आंकडो आनीक 5 हजारान वाडल्या, अशें मुख्यमंत्री डॉ. प्रमोद सावंत हांणी सांगलें.

वॉटर मेट्रो प्रकल्पाची अंलबजावणी पयल्या पांवड्यार घालून जें सदां न्हय मार्गाचो वापर करतात तांकां खर्‍यानीच हाची मजत जातली. एकदां वॉटर मॅट्रो सुरू जातकच मांडवी आनी जुवारी न्हंये वरवीं आमकां उत्तर गोंय आनी दक्षिण गोंय हें जोडपाक मजत जातली. भारत सरकारा वतीन बेगीनच वॉटर मेट्रो मेळटली हाची आमी वाट पळयतात, अशें मनोगत मुख्यमंत्र्यान उक्तायलें.