वेंचणूक मनीसबळाची बांदावळ जाता

भांगरभूंय | प्रतिनिधी

गोंयांत केंद्रीय मंत्री येवंक लागल्यात, सांजांव वा हेर कार्यावळींक. वेंचणूक लागीं येतना फुडल्या दोन तीन म्हयन्यांनी तांचें येवप वाडटलें.

2026 वर्सा जावपी हेर राज्यांच्या वेंचणुकां बराबरीन गोंय विधानसभा वेंचणूक जावपाची शक्यताय दिसता. फोंडें विधानसभा पोटवेंचणूक न जाल्ल्यान विधानसभा वेंचणूक बेगीन घेवची पडुये. राजकी पक्षच न्हय वेंचणूक आयोगाचें थळावें कार्यालय वेंचणुके खातीर मनीसबळाची बांदावळ करुंक लागलां. सरकारी अधिकारी, कर्मचारी वेंचणुकेच्या वावरांत घुस्पतलें तेन्ना तांचो वावर करपाक नवें मनीसबळ आसा.
भारतीय वेंचणूक आयोग अजून मेरेन केंद्र सरकाराक जोडिल्लो आसा. वेंचणूक लागीं येता तेन्ना राज्य सरकाराच्या एका सचिवाक सचीव पदा वेल्यान मेकळें करचें पडटा. भारतीय वेंचणूक आयोगाच्या गोंय कार्यालयांत आशिल्लें मनीसबळ राज्य सरकारा खाला येता. वेंचणुके खातीर राज्य सरकार खासा दुडवांची तजवीज करता. मामलेदार, जोड मामलेदार, जोड सचीव, अवल सचीव, जिल्होधिकारी, उपजिल्होधिकारी, गट विकास अधिकाऱ्यांक वेंचणुकेच्या स म्हयनेआदीं वेंचणुके खातीर वावर करचो पडटा. ताचो परिणाम प्रशासनाचेर जाता. फुडारांत एक राष्ट्र एक वेंचणूक कायद्यांतल्यान भारतीय वेंचणूक आयोगाक चड मेकळेंपण मेळटलें अशी आस्त आसा.
केंद्र सरकारान ब्रिटीशांच्या तेंपा वयले कायदे बदलपाक आरंभ केला. नवे कायदे करतना सरकारान तेंपा प्रमाणे कुरपणे घालां, विदेशी नितीचो अभ्यास केला हें कळटा. म्हायती तंत्रज्ञानान संवसार लागीं हाडला, तंत्रगिन्यानाचे क्रांतीतल्यान घरा बशिल्ले कडेन वरिश्ठ (पिरायेन) नागरिकांक घरा बसून रिमोटाचेर मतदान करुंक मेळचें. गोंय विधानसभा वेंचणुकेंत ती तजवीज करची पडटली. मतदान यंत्रां, ई मतदार वळेरी नितळ करपाक सुरवात जाल्या. अणभवी वेंचणूक मनीसबळ गोंयांत आसा, बरींच वर्सां वेंचणुके वेळार वावर करतल्यांक खासा प्रमोशन मेळ्ळां?
आरक्षणांतल्यान उंचेल्या पांवड्यार पाविल्ले अधिकारी, कर्मचारी प्रशिक्षणांतल्यान बेस बरो वावर करुंक शकल्यात. घुस्मट्टा जनरल कॅटेगरींतलें मनीसबळ, तांच्या प्रमोशनाची वळेरी वेंचणुके तेंपार तयार जातली, प्रमोशनांय मेळटलीं.
पुलीस काॅन्स्टेबल ते अधिकाऱ्यां मेरेनच्यो बदल्यो जाल्यात. नव्या पुलीस मुख्यालयाची बुन्याद घाल्या, बांदिल्ल्या प्रकल्पांचीं उक्तावणां जाल्यांत. वेंचणूक लागीं आयिल्ल्याचीं चिन्नां.
सरकारी पांवड्यार वेंचणूक आयोगाचें थळावें कार्यालय वेंचणुकेचें मनीसबळ बांदतना राजकी पक्षांक मनीसबळाची बांदावळ करची पडटा. आमदार, मंत्री, वेंचणुकेंत येवपाक तयार जाल्ल्या नेतृत्वाचेर राजकी पक्ष थळाव्या मनीसबळाचेर निंबून रावंक लागल्यात. तातूंतल्यान वेवसाय उबारपी आसात.
गोंय विधानसभा वेंचणूक लागीं येतना सरकार, राजकी पक्षांक सादूर रावचें पडटलें. तांचे लागीं आशिल्लें मनीसबळ राजभाशेचें प्रशिक्षण घेतिल्लें आसा, ना तें पळोवपाची गरज उप्रासल्या. थळांतरांतल्यान गोंय राज्य पांवडो मेळचे आदीं, उपरांत प्रशासनात आयिल्ले शिक्षक, अधिकारी राजभास आपणायतात? तांकां गोंय सरकाराच्यो सगल्यो सुविधा नोकरेंत आसतना आनी उपरांतय मेळटात. तांची लागणूक आसची गोंय, गोंयकारपण सांबाळपाची. केंद्र सरकारांत
अधिकारी केंद्रीय मंत्री जाले, तिगले कितले? राज्यांतय आमदार, मंत्र्यांचें सचीव, पी ए, पी एस जाले, तिगले कितले? कांय जाणांक अजूनय उमेद आसा वेंचणुकेच्या झुजांत देंवपाची, ते आमदार, मंत्री आशिल्ले तेन्ना केल्ल्यो घोशणा चालीक लागल्यो? अभ्यास तांणी करचो.
वेंचणुके पासत दोन वर्सां गांवांतले कार्यकर्ते, मतदारां लागीं भासाभास करतले ते जिखतात हो आयज मेरेनचो म्हजो अणभव. वेंचणुकेंत दोनदां जैत मेळूंक नाशिल्ले आमदार संकल्प आमोणकार, मंत्री सुभाष फळदेसाय, आमदार कृष्णा साळकार विधानसभे मेरेन कशे पावले ते तांकां विचारात. आमदार संकल्प, आमदार कृष्णा हांच्यो घरकान्नी शमी, श्रद्धा नगरसेवक म्हणून तांचे बराबरीन वावुरतात. गोंयांक फुडाराची दिका दाखोवपी त्यो अस्तुऱ्यो, तांकां येता ते विधानसभा वेंचणुकेंत संद मेळपाची गरज आसा. तांचे घरकार तांकां वेंचून हाडपाक तेंको दितले. वेंचणूक हारिल्ले, पक्षाच्या कार्यावळींतल्यान मुखार सरिल्ले मुख्यमंत्री डाॅ. प्रमोद सावंत. तांचो अणभव घरकान्न सुलक्षणा सावंत हांकां वेंचणुकेची तयारी करतना उपेगी. आस्त आसा त्यो विधानसभेंत 40 आमदारां मदीं एक आसतल्यो.
गोंयांत केंद्रीय मंत्री येवंक लागल्यात, सांजांव वा हेर कार्यावळींक. वेंचणूक लागीं येतना फुडल्या दोन तीन म्हयन्यांनी तांचें येवप वाडटलें. राजकी पक्ष, सरकार हांच्या जोड पालवान राज्याची उदरगत जावंक शकता. केंद्र, राज्यांत सरकार आसा त्या राजकी पक्षांक वेंचणुके तेंपार, उपरांत दीस बरे येतात. राज्य आनी केंद्राचें डबल इंजीन तें तेंच. गोंयांत सरकारांत नाशिल्ल्या हेर राजकी पक्षाच्या आमदारांनी येवजण्यांचो लाव मतदारांक दिला. आमदारांक तांच्या मतदारसंघांत उदरगती खातीर दुडवांची तजवीज फाटल्या चार वर्सांनी जाल्या. कांय आमदारांनी उदरगतीचे वाटेन वतना आपल्या मतदारसंघांत लोकांक मेळपा पासत कार्यालयां केल्यांत. सदांच त्या कार्यालयांत येवपाक आमदारांक वगत मेळटा? कांय आमदार घरा कार्यकर्त्यांक, मतदारांक मेळटात, मतदारां लागीं उलयतात, आडमेळ्यां तेंपार धांवतात. ते जिखूंक शकतात, तांचे मुखार सर्त आसतली, ना न्हय.
भाजपाचें घर चलो अभियान आयज काँग्रेस तशेंच राज्यांतले हेर प्रदेशीक पक्ष फुडें व्हरतात. काँग्रेसीची यात्रा रोखडीच गोंयांत सुरू जातली, मतदारसंघांतल्या आदल्या कार्यकर्त्यांक, मतदारांक मेळपाचे तो येत्न. प्रदेश काँग्रेसीचे अध्यक्ष गिरीश चोडणकार, प्रदेश भाजपाध्यक्ष दामोदर नायक एका मतदारसंघांतलें. येता ते वेंचणुकेंत तांचो मतदारसंघ संद कोणाक दितलो? प्रदेश भाजपाध्यक्ष आमदार म्हणून वेंचून पयले, दुसरे फावटी आयले तेन्ना तांकां बळगें भौशीक बांदकाम मंत्री दिगंबर कामत हांणी दिलें. आयज दिगंबरबाब पिरायेच्या वरिश्ठ पांवड्यार आपल्या पुताक वेंचणुकेंत हाडटले? दिगंबरबाबां वरीं तांचे पूत नगरसेवक म्हणून नगरपालिका वेंचणुकेंतल्यान अणभव घेतले? जापो फुडल्या दोन अडेज म्हयन्यांनी मेळटल्यो. बांदकाम मंत्र्यांक केंद्रीय मंत्री जावपाची तांक आसा.
काँग्रेसींतल्यान भायर सरिल्ल्यांक परतून घरा हाडपाची तयारी राष्ट्रीय पांवड्यावर सुरू जाल्या. गोंयांत यात्रेंतल्यान परतून घरा येवंक सोदतल्यांक येवकार दितना जतनाय घेवपाची गरज आसा. आत्र्या पयऱ्यान काँग्रेस, भाजपा करतल्यांक पक्षांची दारां उक्तीं करप पक्षाचे कार्यकारणीचो तेंको आसा? तें थारावचें पडटलें. थळावी कार्यकारिणी हायकमांडाचेर सदांच निंबून राविल्ल्यान वेंचणुकेंत चड आमदार आसूनय सत्ते पसून काँग्रेस हे आदीं पयस उरल्या.
राज्यांत मुख्यमंत्री म्हत्वाचे आसात, राजकी पक्ष आनी सरकार बराबरीन वता. पक्षाच्या पांवड्यार मुख्यमंत्री वावराक लागल्यात, देश पांवड्यार तांच्यो बऱ्यो वळखी आसात. केंद्रीय मंत्र्यांच्या फाटल्यान लागून उदरगतीची नवी वाट राज्याक ते दाखयतात, दाखयतले. युवा पिळगेक ते आपले दिसतात तशेंच अस्तुरी, ज्येश्ठांकय.

सुहासिनी प्रभुगांवकार
9881099260