भांगरभूंय | प्रतिनिधी
रवी नायक ः धारगळे कृषी मेळाव्याक उत्स्फूर्त प्रतिसाद
भांगरभूंय प्रतिनिधी
पेडणें ः प्रधानमंत्री नरेंद्र मोदी हांच्या फुडारपणा खाला देश विवीध मळार प्रगती करता. कृषी क्षेत्रा खातीर मोदी सरकारान शेतकारांच्या हिता खातीर कल्याणकारी येवजणो आंखल्यात. गोंयांतूय कृषी खात्याच्यो विंगडविंगड येवजणो आसात. ह्या येवजणांचो लाव शेतकारांनी घेवचो आनी कृषी क्षेत्राचो विकास करचो अशें कृषी मंत्री रवी नायक हांणी सांगलें.
भारतीय जनता किसान मोर्चा हांचे वतीन धारगळच्या पंचायत सभाघरांत आयोजीत केल्ल्या कृषी मेळाव्यांत ते मुखेल सोयरे ह्या नात्यान उलयताले. ह्या वेळार माचयेर पेडणें मतदारसंघाचे आमदार आनी गोंय हस्तकला आनी लघू उद्देग विकास महामंडळाचे अध्यक्ष प्रवीण आर्लेकार, संघटन मंत्री सतीश धोंड, भारतीय जनता पार्टीचे म्हणयारे प्रेमानंद म्हांबरे, जिल्हा पंचायत वांगडी मनोहर धारगळकार, जिल्हा पंचायत वांगडी सीमा खडपे, खारघर पंचायतीचे सरपंच भूषण नायक, चांदेल-हसापूर पंचायतीचे सरपंच आनी भाजपा मंडळ अध्यक्ष तुळशीदास गांवस, भाजप मंडळाची सरचिटणीस उषा नागवेंकार, किसान मोर्चाचे सरचिटणीस उदय प्रभुदेसाय हांची उपस्थिती आसली.
केंद्रांतल्या मोदी सरकाराक आठ वर्सां पूर्ण जाल्यांत. ह्या काळांत प्रधानमंत्री नरेंद्र मोदी हांणी देशहिताचे जे निर्णय घेतल्यात तांचें आयज कवतूक जाता. येता ते लोकसभा वेंचणुकेंतूय केंद्रांत मोदी हांच्या फुडारपणा खाला भाजपाचेंच सरकार भोवमतान येतले. मोदी हे निस्वार्थी. देशाचें हित हें आपलें हित अशें मानून ते फाटलीं आठ वर्सां काम करतात अशें रवी नायक हांणी सांगलें.
केंद्र सरकाराच्या भाजप सरकाराक प्रधानमंत्री नरेंद्र मोदी हांच्या फुडारपणा खाला आठ वर्सां पूर्ण जाल्ले खातीर पेडण्यां कृषी मेळावो घडोवन हाडिल्लो. ह्या मेळाव्यांत सोयऱ्यांचे हस्तुकीं आनी कृषी मंत्र्यांचे हस्तुकीं शेतकारांक कवाथे तशेंच रोंपांचें वांटप केलें. तशेंच कृषी खात्याच्या अंतर्गत विंगडविंगड येवजणांचो लाव घेतिल्ल्या लाबार्थ्यांक ह्या वेळार मंजुरी पत्रां दिलीं.
आज गोंयांत हरित क्रांती करपा खातीर भाजप सरकार बांदिल आसा. कृषी मंत्री रवी नायक हांचेंय हे खातीर मोटें योगदान आसा. सरकाराच्या आनी कृषी खात्याच्या विंगडविंगड येवजणांचो लाव घेवन गोंय प्रगतीचे वाटेर व्हरूया अशें भाजपाचे म्हणयारे प्रेमानंद म्हांबरे हांणी सांगलें.
ह्या वेळार पेडणेंचे दीपक मांद्रेंकार, इब्रामपूरचे अशोक वंसकार तशेंच कोरगांवचे अनिशा कर हांचो शाल, फुलांतुरो आनी स्मरणचिन्न दिवन उत्कृश्ठ शेतकार म्हणून मुखेल सोयऱ्यांचे हस्तुकीं भोवमान जालो. उदय प्रभुदेसाय हांणी येवकार दिलो, प्रास्तावीक केलें. कार्यावळीचें सुत्रसंचालन कृष्णा पालेकार हांणी केलें. प्रशांत हरमलकार हांणी सोयऱ्यांक फुलांतुरे दिवन तांकां येवकार दिलो. अशोक गावस हांणी उपकार मानले,
धारगळच्या कृषी मेळाव्याक शेतकारांचो उत्स्फूर्त प्रतिसाद लाबलो. मेळाव्याक पेडणें कृषी विभागाचे अधिकारी प्रसाद परब आनी ताचें हेर कर्मचारी हांणी ह्या वेळार शेतकारांक विंगडविंगड येवजणांची म्हायती दिली.
‘मोपाक लागून पेडणेंचो विकास जातलो’
मोपा विमानतळाक लागून पेडणें म्हालाचो आनी शेजारच्या म्हालाचो मोट्या प्रमाणांत विकास जातलो. मोपा विमानतळ प्रकल्पाचेर मोट्या प्रमाणांत नोकऱ्यो ह्यो पेडणें म्हालांतल्या आनी सरभोंवतणच्या वाठारांतल्या बेरोजगारांक मेळटल्यो अशें संघटन मंत्री सतीश धोंड हांणी सांगलें. मोपा विमानतळ प्रकल्पा विशीं कांय लोक अपप्रचार करतात. विकासाक खो घालपाचें काम करतात. आमचे कांय भाजप कार्यकर्ते तांकां सांगात दितात. तांणी तें बंद करचें अशें आवाहन तांणी केलें.
‘शेतकारांक शेती खातीर पुराय सहकार्य’
सरकाराच्यो शेतकारां खातीर विंगडविंगड येवजणो आसात. ताचो लाव तांणी घेवचो. तांकां जी 50 टक्के सबसिडी मेळटा तातूंत हांव तांकां मजतीचो हात दितलों. तांकां शेती करतना कसलोच त्रास जावचो वा ताण येवचो ना हाची जतनाय घेतलो पेडणें मतदारसंघांतल्या शेतकारांनी शेती करपा खातीर मुखार येवचें. म्हजें तांकां सदांच सहकार्य आसतलें अशें पेडणें मतदारसंघाचे आमदार प्रवीण आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
