भांगरभूंय | प्रतिनिधी
ट्रकाक ओव्हरटेक करतना घडलो अपघात
भांगरभूंय । प्रतिनिधी
पेडणें: मांद्रें पंचायत वाठारांतल्या आस्कावाडा ते मांद्रें मदलो माज मेरेनचो रस्तो सामको घातक स्थितींत आसा. ह्या रस्त्याचेर सध्या वीज पुरवण विभागा वतीन भूंयगत केबल घालचे खातीर खणलां. अशेच एके सुवातेचेर खणिल्लो रस्तो वेवस्थीत पुरोवंक नाशिल्ल्यान 22 ऑक्टोबराक सकाळीं अपघात जालो. ह्या अपघातांत मांद्रेंची सुप्रिया म्हामल (28) हे नवे व्हंकलेक आपलो जीव वगडावचो पडलो.
सुप्रिया म्हामल आपले ई- दुचाकी (जीए 11 एफ 9823) वयल्यान कामाक वताली. तिच्या मुखार चलपी ट्रकाक (जीए 04 टी 1712) ओव्हरटेक केले उपरांत रस्त्यार आशिल्ले मातये वयल्यान दुचाकी निसरली आनी फाटल्यान येवपी ट्रकाच्या टायरा पोंदां चिड्डली. ह्या अपघातांत तिका सुवातेचेरूच मरण आयलें.
सुप्रिया म्हामल ही मूळची परास्टे पेडण्याची. तीन चार म्हयन्यां आदीं तिचें लग्न जाल्लें. ती ई- दुचाकी वयल्यान म्हापश्या कामाक वतना तिका अपघात जालो.
रस्तो खणटना वेवस्थीत दिशा तकटो वा ते सुवातेचेर दिशा दाखोवपी सुरक्षा रक्षक दवरपाची मागणी केल्ली. खणिल्लो रस्तो पुरयले उपरांत ताचेर हॉटमिक्स डांबर घालपाची मागणी केल्ली. पूण वीज पुरवण विभागान कसलीच दखल घेवंक ना. भूंयगत वीज केबल घालचे खातीर खूब कडेन रस्ते खणटात. खणिल्लो रस्तो वेवस्थीत पुरयनात. ताका लागून अपघात जातात आनी हे फुडेंय घडटले, अशी भिरांत नागरिकांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
