भांगरभूंय | प्रतिनिधी
भांगरभूंय । प्रतिनिधी
म्हापशेंः नगर आनी नियोजन मंत्री विश्वजीत राणे आतां आमचेर वैयक्तीक राग काडपाक लागल्यात. आमच्या वेवसाया कडेन पावल्यात असो आरोप आदलो मंत्री, कळंगूटेचो आमदार आनी विरोधी पक्ष फुडारी मायकल लोबो हांची घरकान्न आनी शिवोलेची आमदार डिलायला लोबो हांणी केला.
बागा डेक आनी नाझरी रिसॉर्टाचें बांदकाम मायकल लोबो राजकारणात येवपाच्या पयलीं केल्लें. विश्वजीत राणेक कांयच खबर ना. तो सामको सकयल्ल्या पांवड्यार येवपाक लागला. वैयक्तीक सूड घेवपा सारकें करपाक लागला अशें डिलायला हिणे पत्रकारांकडेन उलयतना सांगलें.
ओडीपी सारक्यो नासल्या तो सारक्यो करात, पूण अशे तरेन सकयल्ल्या पांवड्यार येवून सुरू केल्लें राजकारण हांव जिणेंत पयलेच फावट पळयता. तो हें सगळें कित्याक करता ते विश्वजीत राणेच सांगपाक शकता अशें तिणे सांगलें विश्वजीत राणे मुदलांत काँगेसाचो, आतां तो भाजपांत गेला आनी मंत्री जाला. ताका जावपा आशिल्लो मुख्यमंत्री मात सादो मंत्री जाल्ल्यान आपलो राग तो विरोधी पक्षाचेर काडपाक लागला अशें डिलायलान सांगलें.
कोणेच सत्तेचो माज आयिल्ले भशेन वागपाक जायना. देव सगलें पळयता आनी दरेकल्यान ताची भिरांत बाळगुवपाक जाय. कोणाच्याय पोटा आड येवचें न्हय. राणेन ताका जाय तें करचें. आमचे कडेन सगले परवाने आसात आनी आमी कोणाकूय भियेनात अशें डिलायलान निमाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
