भांगरभूंय | प्रतिनिधी
हॉस्पिटलांनी विलगीकरण विभागांची वेवस्था
भांगरभूंय I प्रतिनिधी
पणजी : मंकीपॉक्साचाे गोंयांत प्रसार आडावपाक भलायकी खात्यान विवीध उपाय येवजण्यो राबोवपाक सुरवात केली. गोमॅकॉ सयत हेर कांय हॉस्पिटलांनी विलगीकरण कक्षांची वेवस्था दवरल्या. डॉ. प्रशांत सूर्यवंशी हांच्या फुडारपणा खाला दोतोरांचो पंगड सज्ज दवरला, अशी म्हायती भलायकी संचालक डाॅ. गीता काकोडकार हांणी सोमारा पत्रकारां कडेन उलयतना दिली.
मंकीपॉक्स ह्या दुयेंसाचो संवसारभर उद्रेक सुरू आसा. आतां मेरेन 70 परस चड देशांनी मंकीपॉक्साचे दुयेंती मेळ्ळ्यात. भारतातूंत ह्या दुयेंसाचो प्रवेश जालां. केरळांत तीन, दिल्लींत एक दुयेंती मेळून सध्या चार दुयेंती आसात. आठ वर्सां सकयल्या भुरग्यांक गंभीर दुयेंसाचो धोको आशिल्ल्यान संवसारीक भलायकी संघटणेन (डब्ल्यूएचओ) आणिबाणी घोशीत केल्या. हे फाटभुंयेर गोंयांतली भलायकी यंत्रणा सादूर जाल्या.
मंकीपाॅक्स दुयेंसा विशीं केंद्र सरकारान राज्याक जी मार्गदर्शक तत्वां जारी केल्यात, ती सगल्याच भलायकी अधिकारी तशेंच इंडियन मेडिकल असोसिएशनाच्या (आयएमए) गोंय विभागाक धाडून ताची अंमलबजावणी करपाचे निर्देश दिल्यात.
मंकीपॉक्स वा चिकनपॉक्स दुबाविताच्या विलगीकरणा खातीर गोमॅकॉ, दक्षीण गोंय हॉस्पिटल, कासावली हॉस्पिटलांत विलगीकरण कक्ष तयार दवरलां.
तशेंच उपचारा खातीर दोतोरांचो पंगड तयार दवरला. दाबोळी विमानतळ प्राधिकरणा कडेन हे विशीं पत्रवेव्हार सुरू आसा, अशें डॉ. काकोडकार हांणी
सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
