भांगरभूंय | प्रतिनिधी
वाळपयः भुरग्यांचे उदरगतींत पालकांचें योगदान म्हत्वाचें आसता ताका लागून तांणी भुरग्यां कडेन बारीकसाणेन लक्ष दिवपाची गरज आसा अशें पाली सत्तरींतल्या प्राथमीक शाळेची शिक्षका शांती कुडतरकार हिणे सांगलें. वाळपय बाल भवन केंद्रान आयोजीत केल्ले गोकुळअश्टम कार्यावळींत मुखेल सोयरी म्हूणन ती उलयताली.
माचयेर मृदा जोशी, बाल भवन केंद्राचे मुखेली अनिल पोकळे, शिक्षिका मनिषा गांवकार आशिल्ली. दिवली पेटोवन आनी श्रीकृष्णाच्या फोट्याक फुलां हार घालून कार्यावळ सुरवात केली. वेगवेगळ्या सुवातींनी अश्टमीच्यो कार्यावळी जातात. तांचे वरवी भुरग्यां मदीं चेतना तयार जावपाची प्रक्रिया सुरू जाता. ताका लागून अशे तरेच्यो कार्यावळी नेमान घडोवन हाडपाक जाय अशें कुडतरकार हिणे फुडें सांगलें.
श्रीकृष्णाचे विचार सगळ्यां खातीर प्रभावी आशिल्ल्यान तांचो सगळ्यांनी अभ्यास करचो अशें आवाहन मृदा जोशी हिणे केलें. श्रीकृष्णा प्रमाण सगळ्यांच्या जिवितांत संघर्श आसता. तातूंतल्यान वाट का़डपाचो यत्न करपाक जाय अशें तिणे सांगलें.
सुरवेक अनिल पोकळे हांणी सोयऱ्यांचो परिचय करून सगल्यांक येवकार दिलो. पुराय कार्यावळींचे सूत्रसंचालन विद्यालयाची शिक्षिका मनिषा गांवकार हिणे केलें. ह्या वेळार आयोजीत केल्ल्या धंयहंडी आनी सांस्कृतीक कार्यावळींत भुरग्यांनी उमेदीन वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
