भांगरभूंय | प्रतिनिधी
पणजी : पक्षात रावन पक्ष वा सरकार विरोधी विधानां करप्यांनी मुख्यमंत्री वा आपले कडेन पयलीं चर्चा करची. भाजप म्हणल्यार धर्मशाळा न्हय. पक्षाच्या शिस्ती प्रमाण दरेकल्यान वागपाक जाय, अशें सांगून राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणी मंगळारा कळंगूटचे भाजप आमदार मायकल लोबो हांकां शिटकायले.
राज्य सरकार वा मंत्रीमंडळ सत्ताधारी गटांतल्या आमदारांक विस्वासांत घेना. ताका लागुनूच विधानसभेच्या पावसाळी अधिवेशना वेळार कांय विधेयकां फाटीं घेवपाची वेळ सरकाराचेर आयली. हाचोच अर्थ ‘आॅल इज नॉट वेल’ अशें विधान साेमारा मायकल लोबो हांणी पत्रकारां कडेन उलयतना केले.
आमचे कडेन सध्या 40 आमदारां मदी 33 आमदारांचे संख्याबळ आसा. हातूंत अपक्ष आमदारांचोय आस्पाव आसा. तरी लेगीत पावसाळी अधिवेशना वेळार सरकाराक विधेयकां मंजूर करून घेवप शक्य जाले ना. ही विधेयकां अधिवेशनांत मांडपा पयलीं सरकारान आमकां विस्वासांत घेवंक ना. संख्याबळ आसतनाय विधेयक फाटीं घेवची पडटात, म्हणल्यार खंय तरी उदक जिरता, सगले कितें बरे नाशिल्ल्याचो दावोय तांणी केल्लो. ताचेर वास्को उलयतना तानावडे हांणी हाचे मुखार अशी विधानां करची न्हय अशी शिटकावणी दिल्या.
…………………..
कितें म्हणलें तानावडे हांणी?
-भाजप म्हणल्यार धर्मशाळा न्हय. पक्षाच्या शिस्ती प्रमाण वागचे आनी काम करप म्हत्वाचें.
– भौशीक रितीन विधानां करून आमदारांच्यो समस्या सुटच्यो नात. ते खातीर तांणी मुख्यमंत्री डॉ. प्रमोद सावंत वा म्हजे कडेन उलोवन आपल्या समस्यांचेर उपाय काडून घेवचो.
-भाजप शिस्त आशिल्लो पक्ष. दरेकल्याक आपले म्हणणें पक्षा मुखार मांडपाचो अधिकार आसा. सगल्यांचे म्हणणें आयकून ताचेर उपाय काडटात.
-पक्ष वा सरकार चुकना अशें न्हय. पूण पक्षांत रावन पक्षविरोधांत भौशीक रितीन विधानां करप पुराय चुकीचे आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
