भांगरभूंय | प्रतिनिधी
फुडल्या सप्तकांत प्राणीसंग्रहालय उक्तें जावपाची शक्यताय
पणजी: संसर्गजन्य दुयेंसाक लागून तीन उदमाजरां (सीवेट कॅट) आनी दोन रानमाजरांक (वायल्ड कॅट) मरण आयिल्ल्यान लोकां खातीर बंद दवरिल्लें बोंडला प्राणीसंग्रहालय अजून लेगीत बंदूच आसा. ताका लागून सरकाराचो लाखांनी रुपयांचो महसूल बुडलो. प्राण्यांच्या दर्शना खातीर बोंडला येवपी पर्यटकां मदीं मात निरशेवणी पातळ्ळ्या.
मजगतीं, प्राणीसंग्रहालयांतल्या प्राण्यांच्या रगताचे नमुने प्रयोगशाळेक धाडल्यात. तांचो नकारात्मक अहवाल मेळटकच फुडल्या सप्तकांत प्राणीसंग्रहालय उक्तें करतले अशी म्हायती गोपांनी मंगळारा ‘भांगरभूंय’ कडेन उलयतना दिली.
बोंडला प्राणीसंग्रहालयांतलीं तीन उदमाजरां आनी दोन रानमाजरांक ‘एच5एन1’ ह्या संसर्गजन्य दुयेंसाक लागून मरण आयिल्ल्याचें मुखार आयले उपरांत हेर प्राण्यांक संसर्ग जावचो न्हय, हे खातीर रान खात्यान रोखडेंच प्राणीसंग्रहालय लोकां खातीर बंद दवरलें. तशेंच थंयच्या प्राण्यांकूय विलगीकरणांत दवरलें.
सद्या सगल्या प्राण्यांची भलायकी बरी आसा. तांचे पयले जे नमुने प्रयोगशाळेक धाडिल्ले, तांचो अहवाल नकारात्मक आयला. आतां प्राण्यांच्या रगताचे नमुने प्रयोगशाळेंत धाडल्यात आनी तांचो अहवाल नकारात्मक आयले उपरांत रोखडेंच प्राणीसंग्रहाय पर्यटकां खातीर उक्ते करतले अशें गोपांनी सांगलें.
मजगतीं. बोंडला प्राणीसंग्रहालयाक दर वर्सा हजारांनी नागरीक आनी पर्यटक भेट दीत आसतात. तातूंतल्यान सरकाराक लाखांनी रुपयांचो महसूल मेळत आसता. पूण, अंदूं पर्यटन हंगाम सुरू आसतनाच संसर्गजन्य दुयेंसाक लागून फाटल्या एका म्हयन्या सावन प्राणीसंग्रहालय बंद दवरपाची वेळ रानां खात्याचेर आयली. ताका लागून सरकाराचो लाखांनी रुपयांचो महसूल बुडिल्ल्याचेंय गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.