भांगरभूंय | प्रतिनिधी
कोयरा वेवस्थापन मंत्री बाबूश मोंसेरात हांची म्हायती
पणजी: बायंगिणी कोयर प्रकल्पाक कितलोय विरोध जायत आसलो तरी विज्ञान आनी तंत्रज्ञान आनी कोयर वेवस्थापन विभागान पोरणें गोंया बायंगिणी घनकोयर वेवस्थापन प्रकल्पाची निविदा दोन म्हयन्यांत काडटले अशी म्हायती कोयर वेवस्थापन मंत्री बाबूश मोंसेरात हांणी दिली.
ह्या कोयरा प्रकल्पाक विरोध जायत आसलो तरी गरजेची परवानगी घेतिल्ल्यान थळाव्या आमदारांच्या विरोधाचो प्रस्नूच उप्रासना. गोंयांतल्या कोयराची समस्या सोडोवपा खातीर बायंगिणी कोयरा प्रकल्प ही काळाची गरज आसा. आनी ते दिकेन काम सुरू आसा आनी कोयर वेवस्थापन प्रकल्पा खातीर निविदा येता त्या दोन म्हयन्यांत जारी जातली. तेच बरोबर प्रकल्पा कडेन संबंदीत गरजेची परवानगी लेगीत घेतल्या अशेंय मंत्री बाबूश मोंसेरात हांणी सांगलें.
विज्ञान आनी तंत्रज्ञान आनी कोयर वेवस्थापन विभागान हांगासरल्या प्रस्तावीत घनकोयर प्रक्रिया प्रकल्पाचेर लोकां कडल्यान हरकती मागयिल्ल्यो. अत्याधुनीक कोयरा प्रक्रिया प्रकल्प उबारपा खातीर सरकारान बायंगिणी 1.71 लाख चौखण मिटर सुवात पयलींच संपादीत केल्ली. थंय राखणे वणतूय उबारल्या. हें प्रकरण सद्या सर्वोच्च न्यायालयांत सुरू आसा, पूण प्रकल्पाचेर कसलीच स्थगिती ना आनी कायदेशीर आमी प्रक्रिया सुरू दवरल्या. आमचे कडेन कायदेशीर मंजुरी आसा आनी आमी प्रकल्पा खातीर तयार आसात अशें बाबूश मोंसेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
