भांगरभूंय | प्रतिनिधी
म्हापशें: मायनात, भाटी हडफड्यां बशीचें दार आनी माडा मदीं चिड्डून गंभीर जखमी जाल्ले संदेश रामदास मोरजकार (47) हांकां मरण आयलें.
हो अपघात सोमारा सकाळीं 8.30 वरांच्या सुमाराक घडिल्लो. जाल्यार मंगळारा सकाळीं गोमॅकाँत उपचार सुरू आसतना संदेश मोरजकार हांकां मरण आयलें.
घडणुके वेळार मयत संदेश मोरजकार हे आपल्या जीए 03 डब्ल्यू 8424 क्रमांकाचे बशीची नितळसाण करपा खातीर बशींत चडले. ही बस न्युट्रलांत आशिल्ल्यान रिव्हर्सांत वचूंक लागली.
तेन्ना संदेश हांणी रोखडेंच बसीचे स्टेरींग धरपा खातीर ड्रायव्हर सायडीचे दार उगडलें. तेन्ना ते हें दार आनी माडा मदीं आडकून चिड्डले आनी गंभीर जखमी जाले.
रोखडेंच तांच्या कुटुंबांनी तांकां उपचारा खातीर गोमॅकाँत दाखल केले. पूण उपचार सुरू आसतना तांकां मरण आयलें. अपघाताचो पंचनामो हणजून पुलिसांनी केलो.
मजगतीं, मयत संदेश मोरजकार हे हडफडें नागवा पंचायतीचे पंच वांगडी राजेश मोरजकार हांचे भाव आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
