भांगरभूंय | प्रतिनिधी
उमाशेच्या वाटेर आशिल्लो चंद्र, मे म्हयन्यांच्या शेवटाक, फांतोडेर परतून एकदां ताऱ्यां- गिऱ्यां वांगडा मळबांत खेळ करतना दिश्टी पडटलो.
जे तरेन फाटल्या म्हयन्यांत आमचे सुर्य- माळेंतले 4 गिरे चंद्रा सयत एके रेशेंत दिशिल्ले, तेच तरेन ते हे खेपेकूय सगल्यांक भुलोवपाक सज्ज रावतले. ह्या वेळार ‘क्रांतीवृत्ता’ चेर तांची क्रमवारी बदल्लेली दिसतली, तशेंच शनी, मंगळ, गुरू आनी शुक्रा बरोबर, बुध गिरोय तांच्या सांगाताक आसतलो.
खगोलशास्त्रांतल्या ह्या अप्रुपांचे खास आकर्शण, मे म्हयन्यांचे बुधवार 25 आनी शुक्रार 27 तारखेक फांतोडेर घडटलें. बुधवारा फांतोडेर, आमचे सुर्यमाळेंतले 4 आनी 5 नंबरचे गिरे, मंगळ आनी गुरू, चंद्रा बाराबर त्रिकोणी आकारांत दिसतले. कुपांतल्यान आपा- लिपा करीत, हो देखावो पळयतल्यांच्या मनांचेर भुरळ घातलो इतलें निश्चित. तेच तरेन, 27 तारखेक आनी एक ओडलायणी घडणूक घडपाची आसा. आशिया आनी आफ्रिकेंतल्या थोड्या देशांतल्यान, चंद्र, शुक्र गिऱ्याक आपल्या फाटसून लिपयतना दिश्टी पडटलो. काळखें मळब आसल्यार, ते देखावे आनीकूय उठून दिसतले.
पृथ्वीर रावन, ताऱ्यां- गिऱ्यांची आनी आमच्या सुर्यमाळेची वळख पटपाक, असल्या घडणुकांची खूब मदत जाता. पुरातन काळांत आमच्या जाण्टेल्यांनी अशेच तरेन पुराय सृश्टीची रचणूक समजून घेतिल्ली.
दोनूय दिसा, फांतोडेर आकाश निरीक्षणां खातीर हवामान अनुकूल आसपाची शक्यताय व्यक्त जाल्या. तरीपूण मान्सून- पूर्व पावसाचे दीस आशिल्ल्यान वातावरण अचकीत बदलपाची शक्यताय न्हयकारपाक येना. हे सगले देखावे, दुर्बिणी शिवाय उकत्या दोळ्यांनी लेगीत पळोवपाक मेळटले. सुर्या कडेन चुकून लेगीत पळोवचें न्हय, म्हूण सगळ्यांक शिटकावणी.
– गौतम जल्मी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
