भांगरभूंय | प्रतिनिधी
दोगांक अटक, तीन दीस पुलीस कोठडी
म्हापशेंः कासकरवाडो, पर्वरे वाटेर पार्क केल्ली दुचाकी पाडिल्ल्याच्या वादांतल्या संदीप कृष्णा वळवयकार (55) हाचेर लोखणाच्या वारावांन हल्लो करपाचो प्रकार घडलो. ह्या प्रकरणांत पुलिसांनी दुबावीत आरोपी ज्ञानेश्वर विठोबा वळवयकार (69) आनी विठोबा ज्ञानेश्वर वळवयकार (32) ह्या दोगां बापूय-पुताक अटक केल्या.
हो प्रकार आयतारा रातीं 8.30 वराच्या सुमाराक घडलो. ह्या प्रकरणांत जखमी वळवयकार हांची घरकान्न उषा वळवयकार हिणें पुलिशेंत कागाळ दाखल केल्या. कासकरवाड्यार वेताळ मंदिरा लागसार दुबावीत आरोपीचे वायन स्टोअर दुकान आसा. जाल्यार ह्या दुकानाच्या कांय अंतराचेर फिर्यादीचें घर आसा.
घडणुकेच्या वेळार दुबावीत भायर आयले आनी तांणी वळवयकार हांकां जाप विचारलो. हातूंतल्यान वाद जावन दुबावितांनी दुचाकी धुकल़ून उडयली तशेंच वळवयकार हांकां लाेखणाच्या वारावांन मारपेट केली. तातूंत ते गंभीर जखमी जाले. ते उपरांत दुबावितांनी कोयतो घेवन अायले आनी तांणी फिर्यादी आनी जखमीक गंभीर परिणामाची धमकी दिली. जखमींचेर गोमॅकाँत उपचार सुरू आसात.
ह्या प्रकरणांत पुलिसांनी भा.दं.सं, च्या 326,504 अानी 506 (2) कलमा खाला गुन्यांव दाखल केला. ह्या गुन्यांवां खाला दोगांय दुबावितांक अटक केल्या. म्हापशें न्यायालयान दोगांकूय तीन दिसांची पुलीस कोठडेंत दवरपाचो आदेश दिला.
फुडलो तपास पुलीस निरिक्षक अनंत गांवकार हांच्या मार्गदर्शना खाला उपनिरिक्षक प्रतीक भट प्रभू करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
