भांगरभूंय | प्रतिनिधी
सरकाराचे मंजुरेची रानां खातें पळयता वाट
पणजी : राज्यांतल्या दूदसागर घसघशा सयत हेर घसघशांचेर पर्यटकांक वचपाक परवानगी दिवपाचे यत्न रानां खात्यान सुरू केल्यात. ते विशींची फायल खात्यान सरकाराक सादर केल्या, अशी म्हायती रानां खात्याच्या ज्येश्ठ अधिकाऱ्यान दिली.
दूदसागर घसघशा सयत राज्यांतले कांय घसघशे घातक आसात. पावसाळी पर्यटनाची खोस घेवपाक गोंयांत येवपी जायत्या पर्यटकां सयत थळावेय अशा घसघशांचेर वचून मनमानी करतात. अंदूंच्या मॉन्सून हंगामाच्या सुरवातीक कांय दिसांत घसघशांचेर न्हांतना सुमार 8 जाणांक बुडून मरण आयलां. ताका लागून सरकारान राज्यांतले सगलेच घसघशे पर्यटकां खातीर बंद केल्ले. पूण पावसाळी पर्यटना खातीर लाखांनी पर्यटक गोंयाक भेट दितात, अशें मतींत घेवन सरकारान घातक नाशिल्लें 14 घसघशें पर्यटन आनी थळाव्यां खातीर उक्तें केल्यात.
सत्तरींत पाली, चरावणें, हिवरें, गोळावली, सुर्ला, चिदंबरम, नानेली, उकायची खाडी, कुमठळ, मडयांनी-गुळेली आनी खाडी-गुळेली हांचो आस्पाव आसा. तशेंच मायडा-कुळे, भाटी-नेत्रावळी आनी कुस्के-खोतीगांव ह्या 14 घसघशांचोय आस्पाव आशिल्लो. पूण दूदसागराचो आस्पाव नाशिल्ल्यान पर्यटकांनी नाराजी उक्तायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
