भांगरभूंय | प्रतिनिधी
भांगरभूंय प्रतिनिधी
मुरगांव ः भारतीय जनता पक्षाचे सर्वेसर्वा श्यामाप्रसाद मुखर्जी हांचें कार्य प्रेरणा घेवपा सारकें आसा अशें आदले नगर विकास मंत्री मिलिंद नायक हांणी सांगलें.
बोगदा वाठारांत भारतीय जनता पक्षाच्या मुरगांव मंडळाचे वतीन डाॅ. श्यामाप्रसाद मुखर्जी हांची जयंती मनयली. त्या निमतान घडोवन हाडिल्ल्या सुवाळ्याक मिलिंद नायक मुखेल सोयरे ह्या नात्यान उलयताले.
ह्या वेळार तांचे वांगडा मुरगांव भाजपा गटाध्यक्ष संजय सातार्डेकार, आदले नगराध्यक्ष दामोदर कासकार, नगरसेवक दामोदर नायक, प्रजय मयेंकार, आदले उपनगराध्यक्ष शशिकांत परब, नगरसेविका कुणाली मांजरेकार, मंजुषा पिळणकर, आदली महिला गटाध्यक्ष छाया होन्नावरकार आनी हेर भाजपा कार्यकर्ते व्हडा संख्येन हाजीर आसले.
पयलीं देश हे उक्ती प्रमाण सगल्यांनी वागून भारत देशाचो स्वाभिमान राखचो अशी शिकवण आमकां भारतीय जनता पक्षाचे सर्वेसर्वा श्यामाप्रसाद मुखर्जी हांणी दिल्या. तांचे हे शिकवणींतल्यान आमचो देश फुडें वचूंक लागला अशें मिलिंद नायक हांणी सांगलें.
श्यामाप्रसाद मुखर्जी हांचे सारक्या म्हान फुडाऱ्याची आमी याद काडली ना जाल्यार तांणी देशा खातीर दिल्लें बलिदान फुकट वतलें. तांणी केल्लें कार्य आमकां भारतियां खातीर प्रेरणादायी आसा अशेंय नायक हांणी सांगलें.
ह्या वेळार हाजीर आशिल्ल्यांक रोपट्यांचें वांटप केलें. तशेंच संवसारीक पर्यावरणाचें निमित्त सादून रोंपां लायलीं.
ह्या वेळार मुरगांव भाजपा गटाध्यक्ष संजय सातार्डेकार आनी आदले नगराध्यक्ष दामोदर कासकार हांणीय आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
