भांगरभूंय | प्रतिनिधी
सागरमाला प्रकल्प: उच्चाधिकार समितीची दिल्लींत बसका, मुख्यमंत्री डॉ. सावंत हांची हजेरी
पणजीः सागरमाला प्रकल्पा खाला देशभरांत दर्यादेग वाठारांनी वट्ट 6.5 लाख कोटींचे 1,537 प्रकल्प उबारतले. हातूंत गोंयांत जावपी प्रकल्पांचोय आस्पाव आसा. सागरमाला प्रकल्पाक लागून देशाचे निर्गतीतलो गोंयचो वांटो वाडटलो. सागरमाला प्रकल्प राज्याच्या पर्यटना खातीर लावकारी थारतलो. राष्ट्रीय समुद्रविज्ञान संस्था, राष्ट्रीय समुद्र संशोधन संस्था (एनपीओआर) तशेंच विज्ञानीक आनी उद्देगीक संशोधन मंडळ ह्या संशोधन संस्थांचो आस्पाव प्रकल्पांत करचो, अशी मागणी मुख्यमंत्री डॉ. प्रमोद सावंत हांणी केल्या.
केंद्रीय बोटबांदणी उद्देग मंत्री सरबानंद सोनोवाल हांचे फुडारपणा खाला सागरमाला उच्चाधिकारी समितीची दिल्लींत बसका जाली. हे बसकेक मुख्यमंत्री डॉ. प्रमोद सावंत हाजीर आशिल्ले. तशेंच केंद्रीय मंत्री नितीन गडकरी, पियुष गोयल, धर्मेंद्र प्रधान, ज्योतिरादित्य सिंदिया तशेंच हेर राज्यांचे मुख्यमंत्री आनी अधिकारी हाजीर आशिल्ले.
सागरमाला कार्यावळी खाला दर्यादेग वाठारांत 58 हजार 700 कोटींचे 567 प्रकल्पांची निवड केल्या, अशी म्हायती केंद्रीय मंत्री सरबनंद सोनोवाल हांणी बसके उपरांत दिली. दर्यादेग वाठारांतल्या जिल्ह्याचे उदरगती खातीर आराखडो तयार केला. दर्यादेग वाठारांत मुळाव्यो सुविधा तयार जावच्यो आनी अर्थीक कार्यावळी सुरू जावच्यो हो सागरमाला प्रकल्पाचो हेत आसा. दर्यादेग वाठारांनी वट्ट 6.5 लाख कोटींचे 1,537 प्रकल्प जातले. हातूंतले कांय प्रकल्प गोंयांतूय जातले. उच्चाधिकार समितीचे बसकेंत सागरमाला कार्यावळींच्या कामांचो नियाळ घेतलो. 2035 मेरेन 5.5 लाख कोटींचे 802 प्रकल्प पुराय करपाचें उद्दिश्ट आसा. हातूंतले 99,281 कोटींचे 202 प्रकल्प पुराय जाल्यात. पीपीपी तत्वाचेर 45 हजार कोटींच्या 29 प्रकल्पांची कार्यवाही सुरू जाल्या. तशेंच पीपीपी तत्वाचेर 51 हजार कोटींच्या 32 प्रकल्पांची कार्यवाही सुरू जावपाची आसा. फुडल्या दोन वर्सांत देशांत 2.12 लाख कोटींचे 200 प्रकल्प पुराय जातले. केंद्रीय बोटबांदणी उद्देग मंत्रालयान देशांतल्या 140 प्रकल्पांक 8,748 कोटी रुपयांचो निधी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
