भांगरभूंय | प्रतिनिधी
पणजी ः 2047 मेरेन भारताक विकसीत देश करपा खातीर दरेका भारतीयान राष्ट्र निर्मिती आनी नेटान उदरगत करपा खातीर योगदान दिवचें अशें गोंय पुनर्वसन मंडळाचे अध्यक्ष आनी कुंभारजुवाचे आमदार राजेश फळदेसाय हांणी सांगलें.
बिरेस्तारा पोरणें गोंयांतल्या तांच्या कार्यालयांत भारताच्या 78व्या स्वातंत्र्य दीस मनयतना ते उलयताले. ह्या वेळार सरपंच, पंच वांगडी, कार्यकर्ते आनी नागरिक हाजीर आशिल्ले.
प्रधानमंत्री नरेंद्र मोदी फाटलीं चार वर्सां हर घर तिरंगा मनयता. भारताक विकसीत राश्ट्र करप हो तांचो हेत. 2047 वर्सा विकसित भारत करपा खातीर तें अशो मोहीम घडोवन हाडटात. आमच्या देशाच्या उदरगती खातीर आमीय योगदान दिवंक जाय अशें तांणी सांगलें.
गोंयांत आधुनिकीकरणाची ल्हार दिसता, कितलेशेच प्रकल्प चालू आसात आनी जायते प्रकल्प पुराय जाल्यात. तशेंच कुंभारजुवें मतदारसंघांत तांच्या कार्यकाळांत पुराय जाल्ल्या ‘शेतकी सेतू’ सारक्या प्रकल्पां विशीं तांणी सांगलें.
देशभक्तीची भावना उक्तायतना फळदेसाय हांणी म्हणलें, ह्या स्वातंत्र्याच्या दिसा आमी धैर्य आनी आशेचें प्रतीक म्हणून एकठांय उबे रावया. आमी सगळ्यांनी एकठांय येवन उजवाडाचो फुडार घडोवपाचो संकल्प करुया अशेंय आमदार फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
