भांगरभूंय | प्रतिनिधी
दुरुस्ती पुराय; आयज सावन पर्वरेक मेळटलें फावोशें उदक
भांगरभूंय । प्रतिनिधीट
दिवचलः तिळारी धरणाच्या दाव्या मुख्य कानालाक साटेली भेशी भोमवाडी वाठारांत 24 जानेवारीक व्हड खावटें पडिल्लें. ताका लागून फाटल्या 10 दिसां सावन कानालांतल्यान व्हांवपी उदक बंद केल्लें. 3 फेब्रुवारीक कानालाची दुरुस्ती पुराय जाले उपरांत तातूंतल्यान उदक सोडलें.
उदक मर्यादीत स्वरुपांत सोडलां. राती कडेन गती वाडयतले. ताका लागून दिवचले सोमारा सांजे मेरेन जाल्यार पर्वरी आनी हेर वाठारांनी मंगळारा सांज मेरेन उदका पुरवण आदले वरी जातली, अशें संबंदितांनी म्हणलां.
भरावाच्या पोंदा आशिल्ल्या पायपांत पोकळी निर्माण जावन मातयेचो भराव नेमून उदक भायर सरलें आनी खावटें पडलें. खावट्यांतल्यान उदक भायर सरून कुडाशे- वानोशी आनी साटेली- भेडशी रस्तो बंद जाल्लो. खावट्यांतल्यान व्हड प्रमाणांत उदक व्हांवतालें. कानालाक खावटें पडिल्ल्यान उत्तर गोंयच्या उदक शुद्धीकरण प्रकल्पाचेर ताचो व्हड परिणाम जाल्लो. गोंय सरकारान ताकतिकेन ताची फाटपुरवण केली. मुख्यमंत्री डॉ. प्रमोद सावंत, उदकास्रोत मंत्री सुभाष शिरोडकार, मुख्य अभियंतो प्रमोद बदामी आनी पंगडान ताची ताकतिकेन फाटपुरवण केली. मंत्री शिरोडकार हांणी स्वता खावटें पडिल्ले सुवातेक भेट दिवन तिळारी धरण अधिकाऱ्यां कडेन चर्चा केल्ली.
दुरुस्तीकामाक गतीन जावन अखेर सोमारा दनपार मेरेन दुरुस्ती पुराय जाली. ते उपरांत कानालांतल्यान उदक सोडलें, अशी म्हायती प्रमोद बदामी हांणी दिली.
गोंय- महाराष्ट्राचो संयुक्त प्रकल्प आशिल्ल्या तिळारी धरणाच्या दाव्या, उजव्या कानालाचीं कामां गोंयाचे शिमे भितर खुबूच बऱ्या दर्ज्याचीं आसात. मात महाराष्ट्रांत कामाचो दर्जो योग्य तरेन सांबाळीनात. संबंदीत मंत्र्याची आडनदर, बाबत कामां हाचो गंभीर परिणाम तिळारी धरणाच्या उदकाचेर निंबून आशिल्ल्या शेतकार भावांचेर जाता, अशी प्रतिक्रिया कांय शेतकारांनी उक्तायली.
साटेली भेडसी भोमवाडी वाठारांत मातयेचो भराव घालून केल्ल्या कानालाक व्हड प्रमाणार गळटी लागल्या. तशेंच कानाल बांदून सुमार 40 वर्सां जालीं, तरीय ते पक्क्या स्वरुपांत जायनात वा तांची दुरुस्तीचेर लेगीत योग्य लक्ष दिनात. देखभाल, दुरुस्ती ही फकत कागदाचेरूच जाता, प्रत्यक्षांत मात कुस्कुटाचेंय काम जायना, हें चित्र तिळारी धरणाच्या दाव्या, उजव्या तशेंच हेर काम पळयत जाल्यार दिश्टी पडटा, अशें शेतकारांचें मत आसा.
देवेंद्र फडणवीस हांची घेतलों भेटः डॉ. सावंत
मुख्यमंत्री डॉ. प्रमोद सावंत हांणी तिळारीच्या कानाला संबंदांत गंभीर दखल घेतल्या. महाराष्ट्राचे मुख्यमंत्री देवेंद्र फडणवीस हाची भेट घेवन महाराष्ट्र वाठारांतल्या कानालांचें काम दर्जेदार जावचें आनी उदका पुरवण सुरळीत उरची हे खातीर फाटपुरवण करतलों, अशें डॉ. सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.