भांगरभूंय | प्रतिनिधी
पणजी : दिल्ली जाल्ले जी 20 बसकेच्या कला प्रदर्शनांत गोंयची कुणबी साडी, बेबिंका, काजी… आनी हेर बऱ्याच वस्तूंचो आस्पाव आशिल्लो. प्रदर्शनांत तरेकवार दालनां आशिल्लीं. गोंयांत तयार जावपी फर्निचर वस्तू, मातयेचीं आयदानां, देवांच्यो मुर्ती तशेंच हस्त कारागिरी वस्तू प्रदर्शनांत आशिल्ल्यो.
जी 20 बसकेच्यो बऱ्योच कार्यावळी गोंयांत जाल्यात. कार्यावळी जावपी थळांचेर प्रदर्शन भरता. गोंयांतल्या कार्यावळींनी गोंयच्यो वस्तू पळोवपा सयत खरेदी करपाची संद प्रतिनिधींक मेळ्ळी. संस्कृतायेचें दर्शन घडोवपी कार्यावळी जाल्यो. दिल्लींतल्या प्रदर्शनांत लेगीत गोंयचे संस्कृतीचें दर्शन जालें. गोंयांत तयार जावपी वस्तू विक्री खातीर प्रदर्शनांत मांडिल्ल्यो. भारत मंडप हातूंत कल्चरल कॉरीडोर प्रदर्शन जालें. प्रदर्शनांत 30 राज्यां आनी संघशासीत वाठारांतल्यो वस्तू आशिल्ल्यो. ऋगवेदाचें हस्तलिखीत, हजारांनी वर्सां आदलीं पेंटींग प्रदर्शनांत दवरिल्ली. जी 20 डिजीटल प्रदर्शनाचें एक दालन आशिल्लें.
गोंयचो पर्यटन आराखडो संवसारीक नकाशाचेर: मुख्यमंत्री
भारताच्या फुडारपणा खाला जी 20 परिशदेन फुडारा खातीर आनी पुराय संवसारा खातीर नवीन संदी तयार केल्यात. गोवा रोडमॅप फॉर टुरिझम, हो तातूंतलो एक. जी 20 परिशद बसकांचें गोंयांत येसस्वीपणान आयोजन केलां. गोंयच्या पर्यटनाक लागून अर्थीक तशेंच रोजगार संदी राज्यांत तशेंच राज्यां भायर तयार जातल्यो, अशें मुख्यमंत्री डॉ. प्रमोद सावंत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
