भांगरभूंय | प्रतिनिधी
अॅपांत वांटेकार जावचे नात, टॅक्सी धनयांचो निश्चेव
पणजी : गोंयांत प्रवासी येरादारींत आशिल्ल्या टॅक्सी, रिक्षांक एकाच पांख्या खाला हाडपाक जानेवारी 2023 पसून ‘गोवा टॅक्सी अॅप’ सुरू करपाचेर राज्य सरकार ठाम आसा. थळाव्या टॅक्सी धनयांनी ह्या अॅपाक खर विरोध सुरू केला. तशेंच सरकाराच्या अॅपांत वांटेकार जावचे नात, असो निश्चेव केला.
पणजेंतल्या एका बसके उपरांत पत्रकारांनी हे विशीं म्हायती-तंत्रज्ञान मंत्री (आयटी) रोहन खंवटे हांकां विचारल्यार, येरादारी खातें गोवा टॅक्सी अॅपची नोडल एजन्सी. जाल्यार अॅप तयार करून दिवपाची जापसालदारकी म्हायती-तंत्रज्ञान खात्याची. आयटी खात्यान अॅप विशींची तयारी सुरू केल्या. डिसेंबर मेरेन खात्या कडल्यान येरादारी खात्याचें सुवादीन अॅप करतलें. ते उपरांत जानेवारी 2023 पसून राज्यांत अॅपची अंमलबजावणी जातली, अशें तांणी म्हणलें.
गोवा टॅक्सी अॅप हे गोंयकारांचें अॅप आसतलें. ह्या अॅपांत वांटेकार जावपी टॅक्सी गोंयकारूच चलयतले. ह्या अॅपाक लागून टॅक्सी, रिक्षा वेवसाय पारदर्शक चलतलो. अॅपांत वांटेकार जावपी टॅक्सी धनयांनी प्रामाणीक काम केल्यार तांकां चड फायदो मेळटलो, अशें मंत्री खंवटे हांणी नमूद केले.
मजगतीं, गोवा टॅक्सी अॅपाक विरोध करपाक थळाव्या पर्यटक टॅक्सी संघटणांनी बिरेस्तारा पणजे आझाद मैदानाचेर आंदोलन केल्लें. येरादारी खातें नवीन टॅक्सी अॅप हाडून गोंयांतलो परंपरीक टॅक्सी वेवसाय सोंपोवपाक पळयता. खंयचेय परिस्थितींत आमी नवीन टॅक्सी अॅपाक सहकार्य करचें नात. येरादारी मंत्री मॉवीन गुदिन्हो सुवार्था खातीर हे अॅप हाडपाक पळयतात, असो आरोप ह्या संघटणांनी केला.
सरकारान हाचे पयलीं टॅक्सींक फुकट डिजीटल मिटर बसोवन दिले, पूण उपरांत अनुदान दिवपाची हमी दिवन धनयां कडल्यान पयशे वसूल केले. मिटर बसोवन जायते म्हयने जाले, जायत्या जाणांक अनुदान मेळूंक ना. टॅक्सीकारांक ‘माफिया’ म्हणपी मंत्री मॉवीन गुदिन्हो हांचो आमी जाहीर निशेध करतात.
दाबोळी विमानतळार गोवा मायल्साक कावंटर उक्तो करून दिवन सरकारान पयलीच आमचो रोजगार हिसकावन घेतला. आतां मोपा विमानतळार नवीन अॅप आदारीत टॅक्सी हाडून उत्तर गोंयांतल्या टॅक्सी धनयांकूय सरकार सोंपोवपाक पळयतां. ताका लागून सगल्या टॅक्सी धनयांनी संघटीत जावन ह्या अॅपाक विरोध करचो, अशें आवाहन टॅक्सी धनी संजय कोले हांणी केलां.
बदलत्या काळाची गरज वळखून चाळीसूय आमदारांनी गोवा टॅक्सी अॅपाक तेंको दिला. टॅक्सी संघटणांक विस्वासांत घेवन जानेवारी 2023 पसून अॅपची अंमलबजावणी जातली. टॅक्सी संघटणांतल्या मेजक्याच लोकांक लागून हेरांचें नांव कारण नासतना पेड्डेर जाता. हाचे मुखार अशें प्रकार थांबतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
