भांगरभूंय | प्रतिनिधी
काल जाल्ले इंडीयन प्रिमीयर लिगेचे पयले मॅचींत गुजरात टायटन्सान रॉयल चॅलेंजर्स बंगळुरूक 6 विकेटींनी हारयलो. पयली बॅटींग करतना रॉयल चॅलेंजर्स बंगळुरून 170 धांवड्यो केल्ल्यो. गुजरात टायटन्सान 19.3 ओव्हरींनी चार विकेटी वगडावन मोख मेळयली.
राहुल तेवतिया आनी डॅव्हीड मिलर हांणी परतून एकदा गुजरात टायटन्साच्या जैतांत म्हत्वाची भुमिका वठयली. तेवतियान 25 बॉलांनी 43 धांवड्यो केल्यो. जाल्यार मिलरान 24 बॉलांनी 39 धांवड्यांचें योगदान दिलें.
ह्या जैता सयत गुजरात टायटन्साची प्ले ऑफांतली सुवात लागीं लागीं निश्चीत जाल्या. जाल्यार दुसरे वटेन बंगळुरून सेगीत तिसरी हार घेवची पडली.
171 धांवड्यांचो फाटलाव करपी गुजरातान बरी सुरवात केली. वृद्धिमान साहा आनी शुभमन गिल हाणें पयले विकेटी खातीर 51 धांवड्यांची भागिदारी केली. ही जोडी हसरंगान फोडली. ताणें साहाक बाद केलो. फाटले मॅचींत अर्द शेंकडो नोंदोवपी साहान हे मॅचींत 22 बॉलांनी 29 धांवड्यो केल्यो.
शुभमन गिलाक परतून एकदा व्हड खेळी करपाक अपेस आयलें. तो 31 धांवड्यो करून बाद जालो. ताका शाहबाज अहमदान तंबूंत धाडलो.
मजगतीं, बंगळुरू वतीन आदलो मुखेली विराट कोहलीन 53 बॉलांनी 58 धांवड्यांची खेळी केली जाल्यार रजत पाटीदारान 52 धांवड्यांचें योगदान दिलें. गुजराता वतीन प्रदीप सांगवानान चड विकेटी घेतल्यो. अंदूंच्या हंगामांतली पयली मॅच खेळपी सांगवानान 4 ओव्हरींनी 19 धांवड्यो दिवन 2 विकेटी घेतल्यो. मॅक्सवॅलान ताबडतोड बॅटींग करतना 18 बॉलांनी 33 धांवड्यो केल्यो. दिनेश कार्तिक अपेशी थारलो. तो फक्त दोन धांवड्यो करून बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
