भांगरभूंय | प्रतिनिधी
अहवाला उपरांत मुख्यमंत्र्यान घेतली बसका
पणजीः कृती दळान अहवालांत केल्ल्या शिफारशी प्रमाण कला अकादेमी इमारतीचें स्ट्रक्चरल ऑडीट जातलें. कला अकादेमीचें स्ट्रक्चरल ऑडीट आयआयटी चेन्नय वा गोंय अभियांत्रिकी म्हाविद्यालय वतीन करतले. तशेंच कृती दळान दाखयल्ले दोश आदल्या कंत्राटदारा कडल्यान करुन घेवप शक्य आसा काय हाचीय खात्री जातली. बांदकाम खात्याचे मुखेल अभियंतो आनी कृती दळाचे वांगडी सचीव श्रीवल्लभ पै हांणी ही म्हायती दिल्या. मुख्यमंत्री डॉ. प्रमोद सावंत हांणी बांदकाम अधिकाऱ्यां कडेन बसका घेवन हो अहवाल चालीक लावपाचो निर्णय घेतला.
अकादेमीच्या नूतनीकरणाचो दर्जो तपासपाक तयार केल्ल्या कृती दळान बिरेस्तारा अहवाल सरकाराक सादर केल्लो. उपरांत डॉ. सावंत हांणी बांदकाम अधिकाऱ्यां कडेन बसका घेतली आनी अहवालाचेर चर्चा केली.
प्रकाश येवजण, आवाज यंत्रणा, दीनानाथ मंगेशकर हॉलांत बसपाची वेवस्था, वातानुकूलन प्रणाली (एसी डक्ट) हातूंत दोश आसात अशें अहवालांत स्पश्ट केलां. दुरुस्ती वा नूतनीकरणाच्या कामांत मेळिल्ले दोश सुदारतले. आदल्या कंत्राटदारांनी केल्ली कामां आनी तातूंतले तपशील आनी डीफॅक्ट लायबिलीटी काळ तपासतले. दुरुस्ती आनी दोश सुदारपाचें काम शक्य जाल्यार आदल्या कंत्राटदारां कडल्यान करतले. आदल्या कंत्राटदाराक दोश सुदारपाक मेळना जाल्यार नव्या कंत्राटदारां कडल्यान काम करुन घेवपाचो पर्याय आसा. सल्लागारांचो सल्लो घेतले उपरांतच कामां खातीर कंत्राटदारांची निवड जातली.
कामांतले दोश वा उणाव कंत्राटदारांच्या दुर्लक्षाक लागून उरिल्लो आसल्यार भरपाय कंत्राटदारां कडल्यान घेतले. तशेंच गरजेच्या कामां खातीर निविदा जारी करतले. आदल्या कंत्राटदारांच्या निविदांतलो तपशील आनी डिफॅक्ट लायबिलीटी काळाचो विचार करुन निर्णय घेतले. पूण कृती दळाच्या शिफारशी प्रमाण कला अकादेमींतले दोश आनी उणाव पयस करपाचे आदेश डॉ. सावंत हांणी दिल्यात अशी म्हायती श्रीवल्लभ पै हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
