भांगरभूंय | प्रतिनिधी
पणजी : आयआयटी खातीर सांगें वाठारांत जे सुवातीची निवड केल्या, ती सुवात केंद्र सरकाराक मान्य ना. केंद्र सरकारान राज्याक तशें कळयलां. कुशीचो आनीक 2 लाख चौखण मिटर सुवात सरकार विकती घेतलें. खंयचेय स्थितींत आयआयटी सांगे वाठारांत जातली अशें न्हंय येरादारी मंत्री सुभाष फळदेसाय हांणी सांगलें.
कोटार्ली – सांग्यार हांगा आयआयटी खातीर जे सुवातीची निवड जाल्या ते सुवातीचेर 3 लाख चौखण मिटर सुवात दोंगराळ आसा. दोंगराळ वाठाराक लागून केंद्राक ही सुवात मान्य ना. आयआयटी खातीर दुसऱ्या जाग्याची निवड करची अशें केंद्र सरकारान राज्याक सांगलां. निवड केल्ली सुवात केंद्रान अमान्य केल्या अशें मंत्री सुभाष फळदेसाय हांणी सांगलें.
सांगें म्हालांत आयआयटी खातीर तीन सुवाती आसात. हेर सुवातींचो विचार करपाची मेकळीक आसा. खंयचेय स्थितींत आयआयटी सांग्या भायर वचची ना. सुवाती विशीं मुख्यमंत्री डॉ. प्रमोद सावंत हांचे कडेन हांव उलयलां. हे सुवाते कुशीक आनीक 2 लाख जमीन सरकार विकती घेतलो. ही जमीन मेळ्ळी काय प्रस्न सुट्टलो. आयआयटी खातीर पयलीं 15 लाख चौखण मिटर जमनीची गरज आसली. गोंय ल्हान राज्य आसा. इतली जमीन गोंयांत उपलब्ध जावंक शकना. हाका लागून गोंया खातीर केंद्रान जमनीची मर्यादा 7.5 लाख चौखण मिटराचेर हाडली. सांगें वाठारांत जे सुवातेची निवड जाल्या, तातूंत दोंगराळ वाठार चड आसा. 3 लाख चौखण मिटर सुवातेंत दोंगर आसा. हाचेर उपाय म्हूण कुशीची 2 लाख चौखण मिटर जमीन सरकार विकती घेतलें अशें मंत्री सुभाष फळदेसाय हांणी सांगलें.
ते भायर सांग्यार आनीक सुवात आसा. गरज पडल्यार ह्या सुवातीचो विचार जावये अशें तांणी सांगलें. सांग्यार सध्या जे सुवातीची निवड जाल्या, थंय आयआयटी उबारपाक थळाव्या लोकांचो विरोध आसा. ही जमीन शेतजमीन आसा. शेतीचो दावो करीत ग्रामस्थांनी प्रकल्पा आड आंदोलन सुरू केलां. मंत्री तशेंच थळावे आमदार सुभाष फळदेसाय हांचो मात प्रकल्पा खातीर आग्रो आसा. केंद्रान सुवात अमान्य थारायिल्ली आसली तरी लागची जमीन संपादन करपाचो उपाय तांणी सुचयला.
केंद्रान गोयां खातीर 2014 वर्सा आयआयटीक मान्यताय दिली, सध्या अभियांत्रिकी म्हाविद्यालयांत आयआयटी सुरू जाल्या. कायमस्वरूपी कॅम्पस उबारपा खातीर गोंय सरकार सुवातीचो सोद घेता. हाचे पयली काणकोण आनी मेळावलीच्या सुवातीची निवड जाल्ली. दोनूय कडेन विरोध जालो. आतां सांग्यार आयआयटी उबारपाचो प्रस्ताव आसा.
काँग्रेस, गोवा फॉरवर्ड ह्या पक्षांचो सांग्यार आयआयटी उबारपाक विरोध आसा. आयआयटी खातीर हेर कडेन सुवात उपलब्ध आसा. सांग्या वयली सुवात अयोग्य आसा अशें काँग्रेस आनी गोवा फॉरवर्ड पक्षान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
