भांगरभूंय | प्रतिनिधी
-हस्तकला म्हामंडळान दिली म्हायती
पणजी : फाटल्या कांय वर्सांत विवीध कारणांक लागून राज्यांतल्या परंपरीक गणेश मुर्तिकारांचे प्रमाण उणें जायत आसा. हस्तकला म्हामंडळान दिल्ले म्हायती वयल्यान हे स्पश्ट जाला. 2012 त राज्यांतल्या 526 मूर्तिकारांक गणेश मूर्ती खातीर मेळपी सरकारी अनुदान येवजणेचो लाव घेतिल्लो. 2022 त हीच संख्या 376 इतली उणी जाल्या.
राज्यांत दरवर्सां सुमार 50 ते 55 हजार परंपरीक गणेश मूर्ती तयार करता. मात चिकट मातयेचे वाडिल्लें मोल, कामगारांचो उणाव, कुशळ मनीसबळाचो उणाव, प्लॅस्टर ऑफ पॅरिसच्या मूर्तींचो वापर, तरणाट्यांची ह्या वेवसाया कडेन येवपाक अनुत्सूक अशा जायत्या कारणांक लागून परंपरीक मूर्ती तयार करपाचो प्रमाण उणें जायत आसा.
फाटल्या कांय वर्सांत चिकट मातयेचें मोल वाडलां. एक ट्रक मातये खातीर सादारण 30 हजार रुपया दिवचे पडटात. चित्रशाळेंत काम करपी मूर्तिकारांची दिसाची मजुरी लेगीत वाडल्या. गणेश मूर्ती तयार करप हो हंगामी वेवसाय आशिल्ल्यान तरणाटी पिळगी नोकरी सोडून हातूंत येना. तशेंच बंदी आसुनूय प्लॅस्टर ऑफ पॅरिसच्यो मूर्ती सहज मेळटात. हाचो विपरीत परिणाम पंरपरीक मूर्ती तयार करप्यांचेर जाता.
2008 चे येवजणे प्रमाण मूर्तिकारांक चिकट मातयेच्या दरेक मूर्ती खातीर 100 रुपया अनुदान दितात. ते खातीर मूर्तीची उंचाय 1 फूट आसप गरजेचें. फाटल्या 15 वर्सांत अनुदानाच्या मोलांत बदल जावंक ना. वाडिल्लो खर्च पळयल्यार मूर्ती फाटल्यान 250 रुपया अनुदान दिवचें, अशी मागणी मूर्तिकारांनी केल्या. पूण सरकारी पांवड्यार हे विशीं अजुनूय कसलीच कार्यवाही जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
