हांव सादो दोतोर आसलों, पूण आतां….

भांगरभूंय | प्रतिनिधी

(त्या अणभवाच्या नेटार ताणें म्हाका एक ऑपरेशन करून दाखयलें. तें पळोवन आनी ह्या विशयांतलीं पुस्तकां वाचून ताच्या नदरेखाला, तो सांगता तशें, हांवेय एक ऑपरेशन करून पळयलें….. आतां मुखार…)

दोळो हो सामको नाजूक भाग. थोडेशें हे वटेन ते वटेन तोपलें तर अदीकच नुकसान जावपाची भिरांत. ताका लागून ऑपरेशन करतना म्हजेर खूब चेपण आयिल्लें. हांव कांय हातूंतलो तज्ञ न्ही, हें खबर आसलें; तरीय हांव जो येत्न करतां तो बरे भावनेन करतां, ताका येश येवंक जाय, इतलेंच मनांत आसलें. एके बायलेच्या दोनुय दोळ्यांत फुल पडिल्लें. पयलीं एका दोळ्याचें आनी मागीर दुसऱ्या दोळ्याचें ऑपरेशन करप, अशें हांवें थारयलें आनी ऑपरेशन केलें. दोळ्यांचेर पट्ट्यो बांदल्यो. ऑपरेशना पयलीं आनी उपरांत, रातची म्हाका न्हीद नासली. चोवीस वरांनीं पट्ट्यो सोडल्यो. तिच्या सामकार दोन बोटां धरून विचाल्लें,’ हीं कितलीं बोटां?’ तिणें ‘दोन’ म्हणटकच म्हाका खरेंच परमानंद जालो. हाचो अर्थ तिचो दोळो निवळ जाल्लो. मागीर दुसऱ्याय दोळ्याचें ऑपरेशन केलें. तेंय येशस्वी जालें. त्याउपरांत म्हजो आत्मविस्वास वाडलो. मागीर अशीं ऑपरेशन्स हांव सहजतायेन करपाक लागलों.

मोतीबिंदूच्या ऑपरेशना भायर दोळ्यांचे ल्हान- ल्हान उपचारय मागीर आमी आमच्या तपासणेघरांत करपाक लागले. केन्ना- केन्ना दोळ्यांत कोंड्याच्या काडयेचें सामकें बारीक किसर वा धुल्लाचो कण पडटा. हो कण इल्लोसो आसता, पूण ताचो खूब त्रास जाता. दोळो तांबडो जाता, उदक व्हांवपाक लागता. दोळ्यांर उदक मारून जर हो कण भायर सरलोना तर तो काडचो पडटा. नाजाल्यार चोळित राविल्ल्यान हें किसर वा कण अदीकच भितर वता आनी नदरेर परिणाम जांवक शकता. हाचेर कितें करप, हो विचार करतना म्हाका एक युक्त सुचली. म्हजे कडेन घडयाळ सारकें करपाचें सामान आसलें. (आवडटा म्हण हांव घडयाळ सारकी करतालों. हांगां तर ती गरज आसली. प्रकल्पांतली घडयाळ बंद पडली तर चंद्रपूर- नागपूराक केन्ना घेवन वचप ? ताचे परस सामान आशिल्ल्यान हांवूच ती सारकी करतालों.) ह्या सामानांत स्क्रू ड्रायव्हर, भिंग (लेन्स) बी वस्तू आसल्यो. तातूंतल्या भिंगाचो उपेग करपाचो हांवें थारायलें. हो प्रयोग सामको येशस्वी जालो. घडयाळीचे बारीक बारीक भाग पळोवपाक आशिल्ली लेन्स हांव पेशंटाच्या दोळ्यांतलें किसर काडपाक वापरूंक लागलों. दोळ्यांत कितेंय गेल्लो पेशंट आयलो की हांव ताका सकल न्हिदपाक सांगतालों. मागीर कुशीक बसून लेन्स लावन ताचो दोळो पळयलो की तातूंत पडिल्ली वस्त म्हळ्यार ‘फॉरेन बॉडी’ मोटी दिसताली. इंजेसांवांच्या सुयेन तें किसर सट्टकन काडूंक मेळतालें. आनी दोन मिन्टांत ताचें दुख्ख नाच्च जावन तो हांसत घरा वतालो.

घडयाळ सारकी करपाच्या भिंगाचो उपेग हांवें जसो दोळ्यांतलें किसकुट काडपाक केलो, तसोच एक प्रयोग नाकांत आडकल्लो खडो काडपा खातीर केलो. नाकांत खडो घालपाचो खेळ, ल्हान भुरगीं खूब फावटीं करतात. हो खडो तसल्याच आवतां बगर काडप मोटे कठीण काम. त्या खातीर ह्या विशयावेलीं पुस्तकां वाचून हांवें एक हूक तयार केलो. त्या हुकाचें सरळ पोंत आपल्या हातांत धरप आनी दुसरें वांकडें पोंत नाकांत घातलें की खडो वा खंयचीय ‘फॉरेन बॉडी’ एका सेकंदांत काडपाक मेळटा. फकत तितलो वेळ तें भुरगें थीर रावपाक जाय. दुसरे कडेन खंयय धक्को लागलो तर वेगळीच भानगड जावपाची. म्हुणून त्या भुरग्याक घेवन आयिल्ल्या मनशाक हांव सांगतालों, ” तूं भुरग्याची तकली घट्ट धर .” म्हजो सांगाती भुरग्याचे पांय धरतालो. तें भुरगें रडलें तरी तें हालचें न्हय म्हण आमी जतनाय घेताले. टॉर्च पेटोवन, त्या उजवाडांत तो खडो नाकांत खंय आसा तें पळोवप आनी हुकान तो रोखडोच काडून उडोवप, अशें तंत्र आमी तयार केलें.

असोच हांव दातांचोय दोतोर जालों. दातांची वेदना भयंकर आसता. दांत दुखपाक लागलो तर लोकांनीं कितें करप ? हांव मागीर पुस्तक घेवन आयलों. आवतांय हाडलीं. म्हाका तशें दातांत चांदी भरप, ‘रूट कॅनल’ करप, असले प्रकार करपाक येनात. पूण दांत काडपाक येता. म्हज्या आदिवासी पेशंटांकय एकादो दांत गेलो म्हण कांय फरक पडना. वेदना कमी जाल्यो, ताची खोशी तांकां खूब जाता.

अशेतरेन हांव एक सादो दोतोर जसो सर्जन जालों, तसोच ऑर्थोपेडिक सर्जन, डेंटिस्ट, गायनॅकॉलॉजिस्ट अशें सगळेंच जालों. 

(मुखार चलता)

प्रकाशवाटा (मूळ लेखक : डॉ. प्रकाश आमटे)

देविदास गजानन नायक 

98505 35051