भांगरभूंय | प्रतिनिधी
खबरां संस्था
चेन्नय : तामिळनाडूच्या राजकारणांत व्हड घडामोड घडल्या. अभिनेतो ते राजकारणी असो प्रवास करपी थलापती विजय हांणी सरकार स्थापनेचो दावो केला. थलापती विजय हांणी राज्यपाल राजेंद्र आर्लेकार हांची भेट घेवन सत्तास्थापनेचो दावो केला. त्या वेळार भोवमता खातीर गरजेचें आशिल्लें 118 आमदारांचो तेंको आशिल्लें पत्र आदीं दी, अशी मागणी राज्यपालान केल्ल्याची म्हायती मेळ्ळ्या.
सुत्रांनी दिल्ले म्हायती प्रमाण, विजय हांणी आपल्याक 118 आमदारांचो तेंको आशिल्ल्याचें राज्यपालाक सांगलां. त्याच वेळार तांणी टीव्हीके पक्षाच्या 108 आनी हेर 4 अश्या 112 आमदारांच्या सयांचें पत्र राज्यपालाक दिलां. ताका लागून भोवमता खातीर गरजेचे आशिल्ल्या आमदारांच्यो सयो दाखय, अशे निर्देश राज्यपालान विजय हाका दिल्ल्याची म्हायती मेळ्ळ्या.
तामिळनाडू विधानसभेंत थलापती विजय हांच्या टीव्हीके पक्षाक 108 सुवातो मेळ्ळ्यात. जाल्यार स्टॅलीन हांच्या डीएमकेक 59 आनी एआयएडीएमके पक्षाक 47 सुवातो मेळ्ळ्यात. तशेंच काँग्रेसीक 5 आनी पीएमके पक्षाक 4 सुवातो मेळ्ळ्यात.
काँग्रेसीन विजय हांच्या नेतृत्वाक तेंको दिवपाचो निर्णय घेतिल्ल्यान तामिळनाडूच्या राजकारणांत नवें समिकरण तयार जालां. परंपरीक द्रवीड पक्षां पसून पयस वचून मतदारांनी नवो पर्याय वेंचिल्ल्याचें स्पश्ट जालां. ह्या तेंक्याक लागून विजय हांचे सरकार स्थापन करपाचे यत्न अदीक घटमूट जाल्यात.हे वेंचणुकेंत डीएमके आनी एयआयएडीएमके सारक्या परंपरीक पक्षांक व्हड धपको बसला. खूबश्या दसकां सावन चलत आयिल्ल्या राजकी वर्चस्वाक ह्या निकालान व्हड आव्हान दिलां. विजय हांच्या नव्या नेतृत्वाक जनतेन व्हड प्रमाणांत पसंती दिल्या. आतां राज्यपालाची भुमिका, हेर पक्षांचो तेंको आनी निमाणी आंकडेवारी हाचेर सरकार स्थापनेचो मार्ग अवलंबून आसतलो. विजय हांच्या फुडारपणा खालचें सरकार स्थापन जालें जाल्यार तामिळनाडूच्या राजकारणांत व्हड बदल जावपाची शक्यताय उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
