भांगरभूंय | प्रतिनिधी
अवयवाचे नमुने प्रयोगशाळेंत धाडले
भांगरभूंय । प्रतिनिधी
पणजी : सांकोड्डेंच्या रानांत जो वागाचो सांगाडो मेळिल्लो ताचे विशीं सरकारान प्रधान रानां संरक्षका कडेन (पीसीसीएफ) अहवाल मागला. दांत तशेंच मेळिल्ल्या अवयवांचे नमुने प्रयोगशाळेंत धाडून दिल्यात, अशी म्हायती रानां खात्याचे मंत्री विश्वजीत राणे हांणी दिली.
वागाची पिराय जाल्ल्यान ताका सैमीक मरण आयिल्ल्याचो मुळावो अदमास आसा. तरी लेगीत चवकशी जाले उपरांत मरणाचें नेमकें कारण कळटलें. सांकोड्डें वाठारांत फाटलीं बरींच वर्सां कासादोर कासा खातीर भोंवतात. हाका लागून कासादोरा कडल्यान वागाची हत्या जावपाची शक्यताय वाठारांत उक्तायतात. हे नदरेंतल्यान लेगीत चवकशी जातली. मुखेल रानां संरक्षका कडल्यान अहवाल येतकच उलोवप शक्य जातलें, अशें रानां खात्याचे मंत्री विश्वजीत राणे हांणी सांगलें.
सांकोड्डें रानांत धाण्या वागाच्या चामड्याचे दोन भाग सांपडले. हाचो खात्यान पंचनामो केला. वागाक मरण आयिल्ल्याचें निश्चीत आसा. गोंयांत पांच धाणे वाग आशिल्ले. तांच्या मदल्या एका वागाक मरण आयलां, काय हो दुसरो वाग आसा, हें चवशके उपरांत कळटलें. 2009 त 1 जाल्यार 2019त 4 वागांक मरण आयिल्लें. वागांचो आंकडो उणो जायत आसतना एका वागाक मरण येवप ही हुस्क्याची गजाल आसा. हाका लागून वाग मरपाचें कारण कळप म्हत्वाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
