भांगरभूंय | प्रतिनिधी
खबरां संस्था
वॉशिंग्टन डीसी : अमेरिका आनी इराण हांचे मदलो संघर्श सोंपोवचे खातीर आनी अणू वाटाघाटीचो मार्ग मेकळो करपाच्या सामकें लागीं पावल्यात. एक्सिओस हे अमेरिकन संकेतस्थळाच्या एका अहवाला प्रमाण, इराण फुडल्या 48 वरां भितर झूजबंदीक सहमती दाखोवपाक शकता.
अमेरिका आनी इराण ह्या देशां मदीं 14 कलमी समजिकाय कबलातीचो मसुदो तयार केला. जरी हो मसुदो अजून निमाणो करूंक नासलो, तरीय वाटाघाटींनी आतां मेरेनच्या इतिहासांतली सगल्यांत व्हड उदरगत सादल्या.
कबलातींतल्यो मुखेल अटी
सगल्यांत पयली, दोनूय वटांनी दुस्मानकाय सोंपोवपा विशीं घोशणा करतले. दोनूय देशां मदीं 30 दिसांच्या काळांत सविस्तर वाटाघाटी जातल्यो. ह्या चर्चांनी स्ट्रेट ऑफ होर्मूज, इराणाची अणू कार्यावळ आनी अमेरिकेन लायिल्ले निर्बंध सदळ करप ह्या सारक्या मुद्द्यांचो आस्पाव आसतलो. दोनूय देशां मदले चर्चे खातीर इस्लामाबाद वा जिनिव्हा सारक्या शारांचो संभाव्य सुवातो म्हूण विचार करतात.
ह्या मसुद्या प्रमाण, इराण आपली अणू कार्यावळ एका विशिश्ट काळा खातीर स्थगीत दवरपाक सहमती दाखोवपाक शकता. ताच्या बदल्यात, अमेरिका पांवड्या पांवड्यान निर्बंध काडटलो आनी इराणाची गोठयिल्लीं अब्जांनी डॉलर्सांची मालमत्ता मुक्त करपाक शकतलो. ताचे भायर ट्रेट ऑफ होर्मूजांत दोनूय वटांनी लायिल्ले निर्बंध सदळ करतले. वादाचो सगल्यांत म्हत्वाचो मुद्दो म्हणल्यार अणू कार्यावळ कितल्या काळा खातीर स्थगीत करपाची, हो कायम आसा. इराणान पांच वर्सांच्या काळाचो प्रस्ताव दवरला, जाल्यार अमेरिकेन 20 वर्सांच्या स्थगितीची मागणी केल्ली. आतां हाचेर मदलो मार्ग काडपाचे यत्न चालू आसात. सध्या 12 ते 15 वर्सांच्या काळाचेर चर्चा केंद्रीत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
