भांगरभूंय | प्रतिनिधी
भुरग्यांक सानपणांतल्यान भ्रश्टाचार चुकीची वाट म्हणपाचें शिक्षण घरांतल्यान, व्हडांच्या वागण्यांतल्यान आनी विद्यार्थ्यांक शिक्षणांतल्यान मेळ्ळ्यार ते फुडें बरे नागरीक घडटले.
आयज 9 डिसेंबर. आज संवसारीक भ्रश्टाचार विरोधी दीस 2024. ह्या दिसाचो विशय आसा “भ्रश्टाचारा आड युवां वांगडा एकवट करप : फाल्यांच्या प्रामाणीकपणाक आकार दिवप.” भ्रश्टाचार विरोधी यत्नांत तरणाट्यांक आसपावन घेवप हो ह्या विशयाचो हेतू आसा. ह्या विशयांतल्यान तरणाट्यांक भ्रश्टाचार आनी ताचे परिणाम हांचे विशीं शिक्षण दिवप, जागृत करप आनी तांकां कारवाय करपाक प्रेरीत करप हें लक्ष्य आसतलें. मुळ प्रश्न असो. आमच्या समाजांत भ्रष्टाचाराआड खऱ्यांनीच तिरस्कार, तिडक आसा काय कितें? काय दिशीं दिशीं भ्रश्टाचार शिश्टाचार जायत चल्ला काय कितें?
आंतरराश्ट्रीय भ्रश्टाचार विरोधी दिसाचो इतिहास
भ्रश्टाचार विरोधी कबलातीचेर 140 देशांनी निशाणी केल्ली. आनी संयुक्त राश्ट्रांच्या आमसभेन ऑक्टोबर 2003 क संयुक्त राश्ट्रांची भ्रश्टाचाराआड कबलात आपणायल्या उपरांत ती 14 डिसेंबर 2005 दिसा चालीक लायली. भ्रष्टाचारा आड आंतरराश्ट्रीय सहकार्य घटमूट करपा खातीर आनी हे समस्ये विशीं जागृताय वाडोवपाची आनी भ्रश्टाचार विरोधी धोरणां सार्वत्रिक पातळावपाची गरज वाडिल्ल्यान ह्या दिसाक खेरीत म्हत्व आयलां.
भ्रश्टाचार धारणा निर्देशांक
भ्रश्टाचार धारणा निर्देशांक “ट्रान्सपरेन्सी इंटरनॅशनल” हे संस्थे वतीन दर वर्सा उजवाडायतात. 0 ते 100 ह्या प्रमाणांत हो निर्देशांक धोरण निर्मात्यांक वेवस्थेंत दोश सोदून काडपाक आनी ती सुदारपाचे मार्ग सोदून काडपाक मदत करता. 2023 वर्सा भारत जागतीक भ्रश्टाचार धारणा निर्देशांकांत 180 देशांतल्यान 93 वे सुवातेर आशिल्लो. हाचे वयल्यान भारतान भ्रश्टाचार आडावपा खातीर आनी लोकां मदीं जापसालदारकी सुदारपा खातीर घटमूट धोरणां आनी कायदे चालीक लावपाची गरज उक्ती जाता.
इतिहास, म्हत्व आनी विशय
संवसारांतल्या जायत्या देशांनी, खासा करून उदरगतशील देशांनी भ्रश्टाचाराक लागून समाजीक आनी अर्थीक उदरगतीक धोको निर्माण जाता. हाका लागून ही शोशण पद्दत सोंपोवन लोकांक पारदर्शकतायेक चालना दिवपाक प्रोत्साहन दिवप ह्या दिसाचो हेत आसा. जायत्या देशांनी प्रचलित आशिल्ल्या भ्रष्टाचारांतल्यान जावपी पिळवणुकेच्या परिणामा विशीं सामान्य लोकां मदीं जागृताय करपा खातीर दर वर्सा 9 डिसेंबराक आंतरराश्ट्रीय भ्रश्टाचार विरोधी दीस मनयतात. भ्रश्टाचाराचो देशाची प्रगती, उदरगत आनी मोठ्या प्रमाणांत समाजाचेरय जावपी हानीकारक परिणामांचोय हुस्को निर्माण जाता.
भ्रश्टाचार हो असलो गैरवेव्हार आसा जो संवसारभरांतल्या समाजांच्या समाजीक आनी अर्थीक उदरगतीक धोको निर्माण करता. खासा करून तो उदरगतीच्या निधीचो अपहार करता, आनी देखून गरीबांक चड बादता. दुर्दैव म्हणल्यार मजबूर जावन लांच दिवपी गरीब भौसाक हाची जाणविकाय लेगीत आसना. हाका लागून ह्या दिसाचो हेतू ह्या म्हत्वाच्या प्रस्नाचेर लोकांक शिक्षण दिवप आनी शिटूक करप हें चड गरजेचें.
सगळ्या देशांचेर भ्रश्टाचाराचो परिणाम जाता, जी एक जटिल समाजीक, राजकी आनी अर्थीक समस्या मानतात. भ्रश्टाचारा आड जागृताय करून तो उणो करुन हो दीस सगळ्यांक समाजीक, अर्थीक आनी राजकी प्रगतींत बरे गतींत हाडूंक शकता. ते पासत फावो अशे गरजेचे उपाय घेवपाक प्रोत्साहन दिता.
31 ऑक्टोबर 2003 दिसा संयुक्त राश्ट्रांनी भ्रश्टाचाराआड कबलात चालीक लायली. ते उपरांत पयलेच खेपे अधिकृतपणान 9 डिसेंबर 2005 क हो दीस मनयलो.
उदरगत विकृत करपी कृती
आंतरराष्ट्रीय भ्रश्टाचार विरोधी दीस समाजांतली सुरक्षा, शांतताय आनी प्रगती हांचे मदले संबंद उजवाडाक हाडपाचे यत्न करता. भ्रश्टाचार ही देशाची उदरगत आनी शांतताय निर्माण करपाची प्रक्रिया विकृत करपी कृती. तो खंयच्याय देशाचे अर्थवेवस्थेंत आडखळ म्हूण काम करता.
भ्रश्टाचारा आड एकोडो झगडप जरी कठीण आसलें तरी सगळे लोक एकठांय येवन भ्रश्टाचार सोंपोंवपाक वावरत जाल्यार तें अशक्य न्हय. स्वार्थी हेत पुराय करपाच्या हेतान लांच वा भौशीक निधी वा साधनसंपत्तीचो गैरवापर करपाची कृती चालीक लावपी खंयचीय कृती चुकीची आनी अनैतिक आसता. भ्रश्टाचाराक मनापासून ना म्हणत मनशाक सदांच ताचे आड झुजपाक मानसीक बळगें आनी आदार मेळूं येता. भुरग्यांक सानपणांतल्यान भ्रश्टाचार चुकीची वाट म्हणपाचें शिक्षण घरांतल्यान, व्हडांच्या वागण्यांतल्यान आनी विद्यार्थ्यांक शिक्षणांतल्यान मेळ्ळ्यार ते फुडें बरे नागरीक घडटले. ना तर वर्सासना प्रमाण भ्रष्टाचार विरोधी संवसारीक दीस येतलो आनी वतलो. आमचे भौशिक जीण भ्रश्टाचार दिसरात वायटी कसो कुरतडटलो.
– प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
