भांगरभूंय | प्रतिनिधी
झुज पर्व 3 : द्रोण- पर्वाचे पांच दीस
–
(अर्जुन मेल्या उपरांत जैत तांचेच हाची कौरवांक खातरीच आशिल्ली. ते मोटे उमेदीन फुडें येवन सगळी मजा पळोवंक लागले… आतां मुखार… )
अर्जुन उज्यांत लासून कसो मरता हें पळोवपाक जयद्रथूय आपल्या रथांत बसून थंय आयिल्लो. अर्जुनान उज्याक प्रदक्षिणा काडपाक सुरवात करिना फुडें कृष्णान ताका म्हणलें, ‘अर्जुना, तुजें हें धोणू आनी बाणाचो भातो हांचो आतां कांय उपेग ना. तुजे वांगडा तुजीं शस्त्रांय नश्ट जावंदी,’ अशें म्हणून कृष्णान अर्जुना कडेन ताचें धोणू आनी भातो दिलो. अर्जुन मागीर खांदाक धोणू लावन आनी फाटीक भातो बांदून प्रदक्षिणा घालपाक लागलो. इतले मजगतीं होमखण भगाभगा पेटपाक लागिल्लें. अर्जुन आतां उज्यांत उडी मारपाचो आशिल्लो. जयद्रथ अर्जुनाक पळयतालो. अर्जुन आतां उडी घेतलो ही खात्री जातकच जयद्रथ मान रथाच्या भायर काडून वयर सुर्याक पळोवंक लागलो. इतल्यांत कृष्णान म्हणालें, अर्जुना, तो पळय सूर्य आनी हो पळय तुज्या मुखार आशिल्लो जयद्रथ. कृष्णा अशें म्हणटा थंय आसा, अर्जुनान केन्ना आपल्या धोणूक बाण लावन जयद्रथाचे गोमटेर सोडलो आनी ताचो जीव घेतलो हें कोणाक कळ्ळें लेगीत ना. जयद्रथ मरना फुडें एकूच बोवाळ जालो. जे रथांतल्यान सकयल देंविल्ले ते आपल्या रथां कडेन परत धांवले. सगल्यांनी आपलीं शत्रां परत हातांत घेतलीं. लडायेक परत सुरवात जाली. अर्जुनान जयद्रथाक आपले प्रतिज्ञे प्रमाण मारून उडयलो हे खोशेन पांडवांचे सैन्य नेटान लडूंक लागलें. जाल्यार कृष्णान सगल्यांक फटोवन, अर्जुना कडल्यान सगल्या मुखार जयद्रथाक मारलो हे तिडकीन कौरव सैन्य लडाय करपाक लागले.
त्या बोवाळांत द्रोण आनी द्रुपद हांचे रथ एकामेकां मुखार आयले. दोगूय एकामेकांचे सामके दुस्मान आशिल्ले. जयद्रथाक वांचोवप जमूंक नाशिल्ल्यान द्रोण पयलींच पिसावल्लो. द्रुपदाक पळयतकच ताची सगली तिडक भायर सरली. एकामेकांक सोंपोवपाची इत्सा धरूनूच ते बाण सोडपाक लागले. द्रोणान सोडिल्ल्या एका बाणान शेवटाक द्रुपदाचो जीव घेतलो. दुसरे वटेन अश्वत्थामाच्या चपक्यांत घटोत्कचाचो पूत अंजनपर्व सांपडलो. अश्वत्थामान ताका काय न्ही कसो मारून उडयलो. आपलो पूत मेल्ल्यान घटोत्कचाचेर सांवार आयलो.
ताणें कौरव सैन्यांत धुमशेणां घालपाक सुरवात केलीं. मुखार येता ताका तो बडोवपाक लागलो. घटोत्कचाचो तो अवतार पळोवन कौरव सैनीक पळपाचे तयारेक लागले. दुर्योधनान मागीर अलायूध राकेसाक घटोत्काचा आड लडाय करपाक धाडलो. पूण कांय उपेग जालो ना. घटोत्कचान ताची तकली कापून दुर्योधनाच्या रथांत शेवटून मारली. दुर्योधनाक भंयान कापरे भरलें. घटोत्कच कौरव सैन्याक आनीक दवरिना अशें ताका दिसलें आनी तो कर्णा कडेन गेलो. कर्णाच्या हातापायां पडून दुर्योधनान ताका कितेंय कर आनी घटोत्कचाक आतांच मारुन उडय, अशें सांगलें.
दुर्योधनाच्या उतराक मान दिवन कर्ण घटोत्कचा आड लडाय करपाक गेलो. घटोत्कचान कर्णाक नाका शेवट केलो. पूण निमाणें कर्णान एक खाशेलो बाण सोडून घटोत्कचाचो जीव घेतलो. कौरव सैन्यान तितल्यान सुटकेचो सुस्कार सोडलो. घटोत्कचान एकाच दिसा भितर कौरवांचे एक अक्षोहिणी सैन्य नश्ट केल्लें. इतले म्हणसर खूब काळोख जाल्लो. सैनिकांनी पेटयिल्ल्या मशालींच्या उजवाडांत लडाय चलिल्ली. आपल्या पुताक आनी नातवाक मरण आयलें हें कळना फुडें भीम भार आयिल्ले वरी खुदूंक लागलो. ताच्या मुखार आयिल्लो दरेकजाण आपलो जीव व्हगडावन बसलो. दुर्योधनाचे काय भाव भीमा आड लडाय करपाक गेले. पूण भीमान त्या सगल्यांक सर्गाची वाट दाखयली. रात बरीच जाल्ली, पूण द्रोणाच्या मनांत लडाय बंद करपाची नाशिल्ली. दोनूय सैन्यांतले सैनीक थकिल्ले. अर्जुनाच्या लक्षांत तें आयले. ताणें आपलो शंख वाजयलो आनी त्या दिसाची लडाय सोंपली अशें सुचीन केले. लडाय एकदांची सोंपली हे खोशेन सगले सैनीक आपापल्या शिबिरांत परत गेले.
चवदा दिसांच्या झुजांत कौरवांचें सात अक्षोहिणी जाल्यार पांडवाचे चार अक्षोहिणी सैन्य सोंपिल्ले. आयच्या एकाच दिसा जयद्रथ, द्रुपद, घटोत्कच, भूरिश्रवा, अलंबुश, अलायुध, श्रुतायुध, धृष्टद्दुम्नाचो पूत, शिशूपालाचो पूत, घटोत्कचाचा पूत हे सगळे झुजारी आपलो जीव व्हगडावन बशिल्ले. भीमान दुर्योधनाचे छापन्न भाव मारिल्ले. दोनांय शिबिरांत शांतताय पातळिल्ली. दुसऱ्या दिसा संजयान धृतराष्ट्राक चवदाव्या दिसाच्या झुजाचें वर्णन करुन सांगतकच तो आपल्या पुतांची आनी जांवयांची याद काडून- काडून रडूंक लागलो. पूण आता ताचो कितें उपेग?
अनिल नायक
९०४९०७९७८९
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
