भांगरभूंय | प्रतिनिधी
आमी सगळ्यांनी गोंय विद्यापीठांत “लघू फिल्म निर्मिती” पेपर घेवचें पयलीं फकत कथानकाचे नदरेन फिल्मां मजा घेवपाक म्हूण पळयल्यांत. पूण जेन्ना सावन हांव हो पेपर शिकपाक लागलां त्या दिसाच्यान फिल्म पळोवपाची एक नवी नदर म्हज्या सयत हेर म्हज्या वांगड्यांक मेळ्ळ्या. हाचें सगळें श्रेय डॉ. प्रकाश पर्येंकार हांकां फावो जाता. फिल्मां मदली कलात्मकता कशी पळोवप हाची नदर हो पेपर घेतकच मेळटा. ताचेंच फुडलें पावल म्हणल्यार “एफटीआयआय” पुणेची अभ्यास भोंवडी.
गोंय विद्यापीठ, शणै गोंयबाब भाशा आनी साहित्य म्हाशाळेच्या कोंकणी अध्ययन शाखेत आमकां “लघू फिल्म निर्मिती” हो पेपर अभ्यासक्रमांत शिकपा खातीर आसा. हेच निमतान फिल्मां संदर्भात आमकां अदीक म्हायती मेळची म्हूण आमकां हो पेपर शिकोवपी सहयोगी प्राध्यापक डॉ. प्रकाश पर्येंकार, तशेंच मॅडम कृपाली नायक हांणी 24 विद्यार्थ्यांक घेवन पुणेच्या फामाद “एफटीआयआय” शिक्षणीक संस्थेक भेट दिली. गोंयातल्यान भायर सरतना मनाक उमळशीक लागिल्ली ती “फिल्म आनी टेलिव्हीजन इन्स्टिट्यूट ऑफ इंडिया पुणे” पळोवपाची. कारण ही संस्था कशें तरेन विद्यार्थी घडयतात काय? भारतीय सृश्टींतले फामाद अभिनेते, दिग्दर्शक ज्या संस्थेतल्यान घडलें थंय कितें पळोवपा सारकें आसतलें कांय? हेंच विचार मनांत घोळटाले. पुराय भारतांतली ही एक अशी संस्था जंय फिल्मा संदर्भातल्यो तांत्रीक गजाली शिकयतात. देखून चड उत्कंटा आशिल्ली आनी पुणे पावन ती चडूच वाडली. हांगासर राजकुमार राव, जया बच्चन, नसरुद्दीन शाह सारकें व्हड अभिनेते शिकून नामनेक पावल्यात. नटसम्राट लेगीत हांगासर शूट जाल्लें ती जागा पळोवपाक मेळ्ळी म्हूण आनीक बरें दिसलें.
हे संस्थेत एका दिसाक प्रवेस घेवपाक दर एकल्याक 300 रूपयांचो पास लागता. तो घेतलो आनी पयल्याच दिसा आमी एफटीआयआयंत गेली. थंय पांय दवरना फुडें फिल्माच्या जगांत पाविल्ल्याचो भास जालो. पुराय कॅम्पसांत झाडां आशिल्ली आनी थंय शिकपी विद्यार्थी झाडांच्या मुळांत आशिल्ल्या बाकार बसून पुस्तकां वाचताले, कोण शुटींगाची तयारी करताली तर कांय जाणां पोस्टर लायताले. हें वातावरण पळोवन मनाक थाकाय मेळ्ळी. चोंय वटेन वेग-वेगळ्या विभागाच्यो इमारती दिश्टी पडटाल्यो. देखीक-फिल्म अभिनय विभाग, पटकथा लेखन विभागाच्या अंतर्गत अध्ययन कक्ष आनी कार्यालय, रोशन तनेजा फिल्म अभिनय स्टुडियो, टॉम ऑल्टर स्टुडियो, मुख्य थियेटर, सतीश बहादूर सी आर टी संकुल, सॅन्ट्रल कॅमेरास्टोर आदी. तशेंच वण्टिचेर ऍक्टर, ऍक्ट्रस, कॅमेरा, स्लोगन्स अशें चित्रायल्लें दिश्टी पडटालें. हें पुराय दृश्य मनभुलयणें आशिल्लें.
एफटीआयआय चो कॅम्पस इतलो व्हड आसा जो एका दिसा भितर भोंवून सोंपचो ना अश्या तरेचो कारण शिकून घेवपा सारकें थंय खूब कितें आसा अशें म्हणप अतिताय जावची ना. ह्या वेळार आमकां नितीन भास्कर जांणी काजरो, आर्या द डॉटर ऑफ भारत सारक्या फिल्माचें दिग्दर्शन केलां तशेंच चितळें बंधू सारक्या कंपनिच्यो जायराती जांणी केल्यात आनी आतां एफटीआयआय हांगासर पुष्पराज गिरासे आसात हांचे बऱ्यापैकी आमकां मार्गदर्शन मेळ्ळें.
हांगासर आमकां लघू फिल्म आनी माहितीपट करतना खंयच्यो गजाली लक्षांत दवरच्यो, तांत्रीक नदरेन कितें म्हत्वाचें आसता त्या भायर बऱ्यांतले– बरें फिल्म करपाक जाय जाल्यार स्टोरी, पटकथा लेखन, संवाद लेखन, नेपथ्य, दिग्दर्शन, कला दिग्दर्शन, उजवाड येवजण, साउंड डिझायन, डीओपी, कॅमेरा कसो सांबाळप, वेग-वेगळे कॅमेरा लॅन्स आनी जायती म्हायती दिवन फिल्म करपाची प्रक्रिया समजायली. त्या भायर एफटीआयआयंत प्रवेश घेवपाक कशें तरेन अभ्यास करचो पडटा, ते खातीर कसली म्हायती आसप गरजेची हाचेर उजवाड घालो. थंय मिलींद मोरे, विजय धाडवे हांणी लेगीत फिल्मा संबदान बरी म्हायती दिली.
दुसऱ्या दिसा आमी टीएसएम स्टुडियोत भेट दिली. थंय आमकां नितीन भास्कर आनी श्रीधर देशपांडे हांणी स्टुडियो म्हणल्यार कितें, थंय कितें करप आसता आनी खास तरेन स्टुडियो कसो डिझायन करचो पडटा जाका लागून रेकाॅर्डींग वेवस्थीत जाता हाचेर भर घालो. स्टुडियो कसो सांबाळप, स्पिकर कसलें तरेचें वापरप तशेंच पायन झाडाचें लाकूड स्टुडियो डिझायन करपाक वापरतात हाचेर भर दिवन हें सगळें कशें करतात ताचीं सविस्तर म्हायती दिली. अर्थीक नदरेन स्टुडियो डिझायन करपाक कितलो आनी कसो खर्च येता ताचेंय विश्लेशण केलें. उपरांत आमकां साउंड डिझायन कसो करप. स्टुडियोंत फिल्मा खातीर फोलियो कशें करतात, कसलें तरेची वाद्यां लागतात, रेकॉर्ड कशें करतात, डबिंग कशें करप, साउंड इफेक्टस आनी मुव्हमेंट कशें तरेन हाताळप ही विवीध प्रत्यक्षिकां करून आमकां मार्गदर्शन केलें. तशेंच प्रवीण वानखडे, श्रीयुत रानडे हांचे मार्गदर्शन लाबलें. ”फिल्म करपाक फिल्मा प्रती मोग आसप गरजेचो” अशें तांचे मत आशिल्लें. तांणी लेगीत खुबश्यो गजाली विस्तारान सांगल्यो आनी पावला कणकणी खूब बरो अणभव हांवे म्हज्या किंरवटीक बांदून घेतलो.
म्हाका हाचो खूब फायदो जालो कारण म्हजो स्वताचो युट्यूब चॅनल आसा जंय हांव वेग-वेगळ्यां सण-परबांचो,सांस्कृतीक नदरेन जाल्ल्यो कार्यावळी, म्हज्यो कविता, रील, भोंवडे वर्णाचे व्हिडीयो अपलोड करता. ही अभ्यास भोंवडी केल्ल्यान म्हाका म्हजें व्हिडियो आनीक बऱ्या रितीन मांडपाक मदत जातली. तशेंच कॅमेरा कसो हाताळप तें शिकपाची संदय हांगसर मेळ्ळीं. आदी हांव फोटो काडटना कशेंय तरेन काडटालें, पूण आता कॅमेराचें तरे-तरेचें एंगल्स म्हाका समजल्यात. त्या भायर एडीट कशें करप, स्टोरी बरयतना कितें लक्षांत दवरचें, पटकथा कशी बरोवप आदी गजालींचो फायदो म्हाका जालो. हाची मदत म्हाका फुडाराक निश्चीत जातली. हे अभ्यास भोंवडेंतल्यान विशयाच्या बाबतींत खूब कितें नवें शिकपाक आनी पळोवपाक मेळ्ळें. पदव्युत्तर शिक्षणांतले हें खूब मोलादीक खीण म्हूण म्हज्या जिविताच्या उगडास पेटयेंत हे उरतले देखून सुमारा भायर खोस भोगता.
डॉ. पर्येंकार सरांनी ह्या भोंवडेचें स्वरूप थारायतना ती भोवडीं अभ्यासू भोंवडीच कशी आसतली हाचे खातीर खासा तकालस घेतिल्ली. डॉ.पर्येंकार हांणी पुणे आपल्या इश्टां कडेन संपर्क करून नियोजन केल्लें तशेंच ज्या संस्थांक भेट दिवपाची आशिल्ली तांचीय आदीच अनुमती घेतिल्ली. देखून ही भोंवडी चड सुखकर जाली. जिविताच्या दीसपटयेंतलो हो एक आनंददिणो अणभव आसलो.
प्राजक्ता प्रेमानंद गांवकार
9552018689
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
