भांगरभूंय | प्रतिनिधी
आयज 15 ऑक्टोबर. हो भारताचे आदले राष्ट्रपती, मिसायल मॅन डॉ ए पी जे अब्दुल कलाम हांचो वाडदीस. वाचन आनी बरोवपाची आवड आशिल्ले डॉ कलाम हांच्या उगडासाक आयज देशभर वाचन प्रेरणा दीस मनयतात. डॉ. कलाम हांणी 1996 वर्सा ‘इंडिया 2020’ हें पुस्तक बरयलें. ह्या पुस्तकाचेर आदारून तेन्नाच्या नियोजन आयोगान व्हिजन 2020 तयार केलें. डॉ. कलामान वट्ट 24 पुस्तकां बरयल्यात, तातूंतलीं चडशीं विद्यार्थी आनी शिक्षकां खातीर बरयल्यात. विद्यार्थ्यांनी आपलें गिन्यान घटमूट करपा खातीर पुस्तकां वाचूंक जाय, असो तांचो आग्रो आशिल्लो. वाचन केल्यार मनीस गिरेस्त जाता अशें ताचें मत आशिल्लें. ते खातीर भुरग्यांक ल्हान पिरायेचेर वाचपाची आवड आसूंक जाय अशें तें सदांच सांगताले.
आयज वाचन प्रेरणा दीस म्हूण मनोवपाचें मुखेल कारण म्हणल्यार आयच्या मोबायल, इंटरनॅट आनी सोशल मिडियाच्या काळांत विद्यार्थी उणे वाचतात. आयच्या विद्यार्थ्यांक आदल्या काळां सारकी वाचनाची आवड ना. आयच्या सोशल मिडिया आनी इंटरनॅटाच्या युगांत पुस्तक वाचपाचें प्रमाण दिसान दीस उणें जायत आसा. विद्यार्थ्यां मदीं पाठ्यपुस्तकां भायल्या वाचनाची आवड उणी जायत आसा.
पयलीं उमेदीन व्हांवपी वाचनालयां सुकपाक लागल्यात. ग्रंथालयाचीं पुस्तकां वर्सांचीं वर्सां एकाच जाग्यार धुल्ल खायत पडिल्लीं आसतात. साहित्य संमेलनांनी पुस्तकांची विक्री उणी जावंक लागल्या. सोशल मिडियाच्या वेसनाक लागून आयची पिळगी पुस्तकां पासून पयस वचत आसा. सोशल मिडियाच्या आक्रमणाक लागून विद्यार्थी अतिरिक्त वाचन विसरपाक लागल्यात. सोशल मिडियाक लागून वाचन संस्कृताय ना जावपाक लागल्या. वाचन संस्कृताय तिगोवन दवरपा खातीर आनी विद्यार्थ्यां मदीं वाचनाची आवड निर्माण करपा खातीर शाळा आनी म्हाविद्यालयांनी हो दीस मनयतात. ह्या दिसा शाळा, म्हाविद्यालयांतल्या विद्यार्थ्यांक वाचपा खातीर पुस्तकां दितात. वाचिल्ल्या पुस्तकांचेर भासाभास जाता. ह्या दिसा शाळा, म्हाविद्यालयां आनी सरकारी संस्था वेगवेगळे कार्यक्रम, परिसंवाद आयोजीत करतात. वाचन संस्कृताय वाडोवपा खातीर दरेकल्यान आपल्या इश्टांक आनी नात्यांतल्यांक पुस्तक भेट दिवचें. सगळ्यांनी सप्तकाक एक पुस्तक तरी वाचूंक जाय.
वाचन प्रेरणा दीस हो एक तोखणायेचो उपक्रम. आयच्या युगांत आमी विसरल्यात की गिन्यान ही एक व्हड शक्त. वाचना वरवीं आमकां इतिहासाचें गिन्यान, वर्तमानकाळाची जाणविकाय आनी फुडाराची अपेक्षा मेळटा. वाचन हें गिन्यान मेळोवपाचें सगळ्यांत प्रभावी साधन. सतत वाचून आमची बुद्दीची तांक वाडटा. तातूंतल्यान मनशाची विचार करपाची पातळी सगळ्या वटांनी विकसीत जाता. वाचनांतल्यानूच मनशाचें व्यक्तिमत्व तयार जाता. वाचन मनशाक सुसंस्कृत करता. बरें वाचले उपरांत, बरें आयकले उपरांत आमचे विचार समजुदार जातात. तांकां खोलाय मेळटा. ताका लागून आमचें मनूय निवळ जाता. कितें बरें कितें वायट तें आमकां कळटा. आमची भाशा सुदारता. वाचन व्यक्तिमत्व विकसीत करता. मनशाचें जिवीत फुलपाक वाचनाचो व्हड वांटो आसता. देखून वाचनाचो छंद वाडोवन आपलें जिवीत गिरेस्त करचें.
मानसीक ताण उणो करपा खातीर पुस्तकांच्या सांगातांत रमपाक जाय. बऱ्या पुस्तकांचो, विचारांचो आमच्या जिविताचेर सकारात्मक परिणाम जाता आनी जिणे विशीं आमची नदर सदां खातीर बदलता. इतिहासीक पुस्तकां वाचप्यांच्या मनांत राष्ट्रवाद निर्माण करतात. कथा आनी कादंबरी वाचून वाचप्यांच्या मनांत मनीसपणाची भावना जागृत जाता. कविता वाचल्यार आमच्या मनांत संवेदनशीलताय निर्माण जाता. व्हड मनशांचीं चरित्रां वाचल्यार प्रेरणा मेळटा. दिसाळीं वाचल्यार समाजीक जागृताय निर्माण जाता. पुस्तकां दुबळ्या मनाक बळ दितात, जाका लागून उदास मनीस खून, आत्महत्या करप टाळटा. भुरग्यांक ह्या दिसांनी खूब ताण येता. हो ताण उणो करपाचें एक प्रभावी माध्यम म्हळ्यार वाचन.
एकूणच वाचन मनशाक सर्वगुणसंपन्न करता. ताचे भितर नैतिकता रुजयता. आयज वाचनाच्या उणावाक लागून समाजांतलीं नैतीक मुल्यां उणीं जायत आसात, देखून नवे पिळगेक परत एक फावट वाचन संस्कृताये कडेन व्हरप ही काळाची गरज. वाचन संस्कृताय आमच्या आनी समाजाच्या बऱ्या खातीर तिगोवन दवरची पडटली. तरणाटे पिळगेक आमी वाचोवंक जाय जाल्यार तातूंत वाचन संस्कृताय रुजोवंक जाय. वाचन प्रेरणा दीस सारकिले उपक्रम ते खातीर उपेगी पडटले हें निश्चीत.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
