देवी स्कंदमाता

भांगरभूंय | प्रतिनिधी

नवरात्रां ः माळ पांचवी

नवरात्रांची पंचम म्हूणल्यार माता स्कंदमातेच्या पुजेचो दीस.  कुमार कार्तिकेयाक देव स्कंद ह्या नांवानूय वळखतात.  देव- असुरांच्या झुजांत कुमार कार्तिकेय देवांचो सेनापती जाल्लो. भगवान स्कंदाची आवय माता पार्वती आनी महादेवाची घरकान्न जाल्ल्यान तिका स्कंद माता म्हूण वळखतात.  देवी स्कंदमातेची उपासना केल्यार मोक्ष मेळता अशी श्रद्धा आसा.  देवी स्कंदमाता आपल्या भक्तांच्यो सगळ्यो इत्सा पुराय करता.

स्कंदमातेला चार हात. उजवे वांटेतलो दुसरो वयर उबारिल्ले स्थितींत आसा.  त्या हातांत कमळाचें फूल आसा.  दावे वटेंतल्या दुसऱ्या हातांतूय एक कमळ आसा.  कमळ स्कंदमातेंचे शस्त्र म्हूण तिच्या दोन हातांनी आसा. गोरे कांतीची स्कंदमाता कमळाचेर विराजमान जाल्या.  कमळाचेर बशिल्ल्यान तिका पद्मासन देवी म्हूण पाचारतात.  शींव  स्कंद मातेचें वाहन.  स्कंदमातेची पूजा केल्ल्यान भक्ताच्यो सगळ्यो मनोकामना पुराय जाता. या नश्ट जावपी संवसारातच तिच्या भक्ताक परम शांती आनी उमेदीचो अणभव येता.  स्कंदमातेची पूजा केल्ल्यान बालरुपी देव स्कंदाचे पुजेचें पुण्य मेळटा.    

गोंयातलें नवरात्राचें पांचवे माळेचें म्हत्व वेगळेंच आसा.  नवरात्रांचे पंचमीक ललितापंचम म्हणटात.  गोंयांत ते दीस कांय घरांनी मोठो उत्सव जाता.  आपल्या घराकाराचो अपमान माता सतीक सोंसना जायना जाल्ल्यान तिणें हवनान घालून घेवन जीव दिलो. म्हादेवाक हें कळ्ळे उपरांत तो सती देवीच्या घरा पावलो आनी सती देवीची कूड खांदार घेवन हे वटेन ते वटेन रागारागान भोंवपाक लागलो.  ताणें आपल्या सुदर्शन चक्रान देवीचे कुडीचे कुडके- कुडके केले.  ह्याच वेळार माता सतीन म्हादेवाक आपल्या काळजांत दवरलो आनी तेन्नाच्यान ती माता ललिता जाली, अशें पुराणीक कथेंतल्यान कळटा.  

पांचवे माळेक स्कंदमातेच्या पुजे सयत ललिता पंचम मनयतात आनी वांगडा शिव पार्वतीचेंय पुजन करतात. माता ललिता ही 10 म्हाविद्यां मदली एक अशी धारणा आसा. ताका लागून हें व्रत करपी भक्ताचे सगळे त्रास ना जातात आनी माता ललितेचे आशिर्वाद मेळटात. माता ललितेक त्रिपुरा सुंदरी आनी शोडाशी अशेंय म्हणटात. उपांग ललिता अशेंय संबोधतात. 

फोंड्यां केरीचें शिकेरकर घराणें, वन मावळिंगे, दिवचले भिडे घराणें, पेडणेचें लाड घराणें, प्रभू पार्सेकार घराणें, अस्नोडचें शेणवी मुळगांवकार घराणें, तरवळें-बोरीचें देसाय घराणें आनी बोरीचें देसाय घराणें ललिता पंचम व्हडा दबाज्यान मनयता.  हीं घराणीं म्हाप्रसाद दवरतात. ताका गांवचो चडसो लोक हजर रावतात. पेडण्यांत जावपी खाशेलेपण म्हळ्यार ह्या उत्सवाक फुलांची माटोळी बांदतात. माटोळेक ह्या हंगामांत मेळपी फुलां आसता. आतां बाजारांत असंख्य  तरेची आयात जाल्लीं फुलां मेळटात, अलंकारित रितीन तांची सजावट करूं येता म्हूण माटोळेक बांदूक ह्या फुलांचो उपेग करता आसत. फुलां वांगडा कांय फळांय माटोळेक बांदतात.  देवीक घाल्लो हार माटोळे वेल्यान सकयल देंवयतात (पेडण्यां ललिता पंचम). ललिता पंचमीची पुजा करतलीं जोडपें णव दिसांचो उपास करतात. 

ह्याच दिसा कुमारिकेचें पुजन करतात.  ही पुजा चडशी सांजवेळार जाता आनी रातभर भजन करून रात काडटात. हे पुजेचें खाशेलेंपण म्हळ्यार ह्या पुजेक 48 दुर्वा वापरतात. कवळें, फोंडेंच्या देवळांत ही ललिता पंचम जाता.  

प्रीता परब

9921382375.