भांगरभूंय | प्रतिनिधी
देवाच्या प्रसादाचे लाडू थळाव्या, घराव्या तुपाचे आसचे. मिठायेच्या दुकानांनी मोदक, लाडू घेतना तूप कसलें वापरतात ताचो अदमास गिरायकांनी घेवं येता.
तिरुपतीच्या निवेद्याचो लाडू देस, विदेसांत नामना जोडपी. पार्सलांनीय तो धाडटात. हालीं लाडू आनी हेर खाणां धाडपा पासत जतनाय कशी घेवपाचें तें कुरियर कंपनींय सांगतात. खासा वेवस्थाय ते पासत करप, पार्सल देवस्थाना कडल्यान व्हरप हो वावरय कुरियर कंपनीं करतात. गरजे प्रमाण पार्सलां उसोवन परतून बांदपाचो वावर कंपनींक करचो पडटा. एका तिरुपतीच्या लाडवान देसांतली अन्न राखण, शिजोवपाची यंत्रणा जागी जातली, घराव्या (तिरुपतींतल्या) तुपाचो लाडू भक्तांक मेळटलो अशी आस्त बाळगूया.
कित्याक घडली ही घडणूक? तिरुपतीचो लाडू हो राजकारणाचो विशय? राज्यांत हालींच जाल्ल्या सरकाराच्या बदलांतल्यान लाडवांतय राजकारण येवंक लागलां? आंध्र प्रदेशाचे मुख्यमंत्री एन चंद्रबाबू नायडू तिरुपती तिरुमला देवस्थानाक चड लागींचे. लाडू आदीं कसो आशिल्लो? खंय पावलो? आतां कसो जाता? हें तांकां खबर आसतलेंच.
तिरुपती तिरुमला देवस्थान हें दक्षीण भारतांतल्या चार राज्यांचे शिमे लागसारल्ल्या वाठारांत आसा. एकादरे नव्या राज्याची निर्मणी त्या वाठारांतल्यान कित्याक जावची न्हय? तिरुपतीचो बालाजी गोंयां मेरेन फोंडे तालुक्यांतल्या देवळांत पावला. त्या देवळांतय तिरुमला सावन प्रसादाचे लाडू येतात? भक्तां मेरेन पावतात?
सैम सांगातांत आशिल्लें गोंयांतलें तिरुपती बालाजी देवस्थान आंध्रांतल्या तिरुपती देवळावरी नामना जोडपी ना. फुडारांत पर्यटनाच्या नकाशार तें गेल्यार गोंयच्या गोविंद, गोवा डेरीच्या तुपांतल्यान प्रसाद जावचो. तूप आनीक शुद्ध करुन, तुपांतलें चरबेचें प्रमाण उणें करुन. चडशा कंपनींच्या तुपाच्या पाकिटार चरबेचें प्रमाण बरयल्लें आसता. तूप करपी, कंपनीं वाडटात तशें चरबेचें प्रमाणय वाडटा आसतलें.
तिरुपतीचो लाडू लागसल्ल्या वाठारांतल्या कंपनींच्या तुपांतल्यान जायना हें मुख्यमंत्री नायडू हाणीं मान्य केलां. गुजरात ते उत्तराखंड मेरेनच्यो शेंकड्यांनी तूप, तेल करपी कंपनींचो म्हाल देवस्थान लाडू करपाक वापरता. तुपांतच न्ही जाल्यार तेलाच्या, दुदाच्या उत्पादनांनी तातूंतल्यो कांय कंपनीं बुडल्यात ही खबर आतां संवसारभर पावल्या.
तिरुपती वरीं लाडू मुंबयच्या सिद्धीविनायक गणपती देवळाच्या वाठारांत विकतात. सवाय दरान ल्हानशा बाॅक्सांत घालून. तिरुपतीक ल्हान लाडू भावीकांक, पर्यटकांक फुकट दितात. महाराष्ट्रांतय दुदा, तुपाच्यो नव्यो कंपनीं आयल्यात, त्यो तिरुपती मेरेन कित्याक वच्च्यो न्ही?
तिरुपतीच्या लाडवांनी तुपाचे अस्सलतेक आव्हान दिलां. बेगीन सोद घेवन, तपासून तूप असली, नकली खंयचें तें केंद्र सरकारान सांगप बरें. सगल्या राज्यांनी तांच्या राज्यांतल्या डेरींनी तूप करपाच्या पद्धतीचो नियाळ करचो. अन्न आनी वखदां प्रशासन संचालनालय आसाच त्या भायर डेरींची आपली अशी प्रयोगशाळा आसता. भायल्या राज्यांतल्यान येवपी तुपाचे नमुने तपासपाची सुविधा राज्यांच्या शिमेचेर आसा?
तुपाच्या कंपनींनी पाकिटार, बाॅक्सार, डबे, बाटल्यांचेर चरबेचें प्रमाण बरयतना चरबी कसली? नुस्तें, मटणाची तेंय बरोवचें.
चरबी (फॅट) तुपांत घालतात हें सत कोण न्हयकारतलो? तिरुपतीचो लाडू वळटना तें कळ्ळें ना? बदाम, पिस्ते, काजूबियो, खिसमीसांच्या वासांत तुपाचो वास येना?
घराव्या तुपाचो उपेग हालीं वाडत आसा आनी ते नदरेंतल्यान तुपाचे नमुने तपासपाची गरज उपरासल्या. देवाच्या प्रसादाचे लाडू थळाव्या, घराव्या तुपाचे आसचे. मिठायेच्या दुकानांनी मोदक, लाडू घेतना तूप कसलें वापरतात ताचो अदमास गिरायकांनी घेवंक येता. मुखेल उत्सवाच्या दिसांनी सादूर रावचेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
