भांगरभूंय | प्रतिनिधी
घुमटांच्या तालार सगले स्वताकूय विसरून गेले. ही घुमट कला फुडल्या पिळग्यां खातीर आमी सांबाळून दवरपाक जाय.
राज्यांतल्या देड, पांच, सात दिसांच्या गणपतींचें वाजत, गाजत, टाळ, पखवाजाच्या तालार, गणपती बाप्पा मोरयाच्या जयघोशांत विसर्जन जालें. थोड्यां कडेन णव दीस, एकवीस दिसांचे गणपती अजून आसात. थोडे गणपती आंगवणेचे आसात. सगलो वाठार गणरायाक लागून भक्तीमय जाला. घरांतलें वातावरण पुराय बदलून गेलां.
चवथीक सगल्यांत चड गाजतात वा गाजल्यो त्यो घुमट आरती. भौशीक गणेश मंडळाच्या माटवांनी इकरा दिसांच्या गणपती मुखार तर घुमटां वाजोवपांत सगले तल्लीन जाल्ले नदरेक पडटा. आरती वेळार शामेळ, कांसाळे आनी घुमटाचें वाजत मन प्रसन्न करता. घुमट वादन ही गोंयचे मातयेंतली कला. पुर्तुगेज काळा सावन ती चलत आयल्या. दादलेच न्हय, तर बायलो पसून घुमट आरतीचें सादरीकरण करतात. कुशळ कलाकारांची व्हड संख्या आसा. घुमट आरतीच्यो शेंकड्यांनी सर्ती आतां मेरेन गोंयांत जाल्यात. आतां म्हाविद्यालयां पसून तातूंत वांटो घेवपाक लागल्यांत.
घुमट वादनाचें प्रशिक्षण भुरगीं घेवपाक लागल्यांत. ही बरी गजाल. ताका लागून ही गोंयची कला तिगून उरतली. ह्या वादनाचो एक विशिश्ट ताल आसा. गोंयां भायर तो पळोवपाक मेळना. पूजा, धर्मीक कार्यावळींनी तरणाट्या कलाकारांची पिळगी उमेदीन वांटो घेता. घुमट आरती सादर करता. घुमटांचें हेर तरांचेंय वादन जाता, तें तरणाट्यांनी शिकून घेवपाक जाय. ह्या वादनाचे वर्ग आयोजीत करपाक जाय. घुमटा खातीर गाराचें चामडें वापरताले. मात आतां गार मारप गुन्यांव. ताका लागून बोकड्याचें चामडें वा सिंथेटिक चामडें वापरून घुमटां तयार करतात.
हे चवथीक दरेक घरांत घुमट आरती जाल्यो. घुमटांच्या तालार सगले स्वताकूय विसरून गेले. ही घुमट कला फुडल्या पिळग्यां खातीर आमी सांबाळून दवरपाक जाय.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
