विठुराया

भांगरभूंय | प्रतिनिधी

कमरेचेर दोनुय हात, सवळें पितांबर, कपलाक गंध कुंकमाचो टिळो, गळ्यांत लांबूच लांब तुळशी माळा घाल्ल्या गोंडस विठुरायाक पळोवन तान भुक न्हिवता. मन श्रद्धेन भरून येता.

विठ्ठल विठ्ठल, जय हरी विठ्ठल, हो जयघोश टाळ- मृदुंगाचो मधुर आवाज कानार पडलो की ह्या वाठरांत खंय तरी विठ्ठलाचे देवूळ आसा हे कळपाक वेळ लागना. ह्या जयघोशाच्या आवाजान आमचीं पावलां पडपाक लागतात आनी आमी थेट विठ्ठल देवळाच्या दारांत पावतात. उत्सव आयलो म्हणतकुच फुलांची सजावट, विद्युत रोशणायेन देवुळ सामकें झगमगुन वता. देवळाची सोबितकाय दोळे दिपून उडयता. देवळांत भितर गर्भकुडींत कमरेर दोनूय हात दवरिल्ली विठ्ठल, सत्यभामा आनी रुक्मिणी कोणाची तरी आतुरतायेन वाट पळयता, असो भास जाता.

दरेका म्हयन्यात दोन एकादशी येतात. जायत्यो बायलो ह्या दिसा कडक उपास धरतात. पूण आषाढ आनी कार्तिक म्हयन्यांतले एकादशीक खुब म्हत्व आसा. ह्यो दोनूय एकादशी भाविकाच्या सांगातान देवळांत मनयतात. विठुरायाची संगमरवरी काळी पाषाणी मुर्ती वांगडा दोनुय कुशीक रुक्मिणी, सत्यभामेची मुर्ती नवी मुस्तायकी भांगरा फुलांच्या हारांनी सजयतात. कमरेचेर दोनुय हात, सवळें पितांबर, कपलाक गंध कुंकमाचो टिळो, गळ्यांत लांबूच लांब तुळशी माळा घाल्ल्या गोंडस विठुरायाक पळोवन तान भुक न्हिवता. मन श्रद्धेन भरून येता. विठ्ठलाचे साजिरे विलोभनीय रुप मनाक भुरळ घालता. विठुरायाक दोळ्यांन सांठोवन दवरुं अशें जाता.

गोंयात सांखळे, फोंड्यां विठोबा, मडगांव हरीमंदिर आशिल्ल्या विठुरायाच्या देवळांत दोनुय एकादशी व्हड उमेदीन शेंकड्यांनी भक्तगण एकामेकां सांगातान भक्तीभावान मनयतात. सकाळीं विठुरायाक स्वतः गर्मकुडीन वचुन दुदाचो रुद्राभिशेक करपाची प्रथा अजुनुय चलता. हजारांनी लोक रांकेंत रावन विठ्ठलाचे दर्शन घेतात. आंगवण करतात. तुळशी हार अर्पण करतात. अभंग, म्हाभोजनाचो आस्वाद घेतात. सांखळे गोपाळकालो करतात. देवाची पालखी काडटात.

हालींसराक हजारांनी गोंयकार भक्त पंढरीचे वारीक वतात. पावस, वारो, थंड वातावरणांत इतली वाट ते चलत वतात. पूण पांडुरंगा वयले निसुवार्थी भक्तीक लागून तांकां भलायकेचे कसलेच त्रास जायनात. तांचें तन, मन विठ्ठलाच्या चरणी ओंपिल्लें आसता. चलत पंढरीची वारी करप म्हणल्यार एक पुण्यकर्मच. 

आषाढी आनी कार्तिकी ह्यो दोनुय एकादशी म्हणजे आमकां बायलांक एक पर्वणीच. न्हावन धुवन कडक उपास धरप, विठ्ठलाची पुजा- अर्चा करप संवळे, फराळ देवाक नैवेद्य म्हणुन मुगा कण्ण, चणे उसळ, रोटी, उकडलेली कणगां भेटोवप. दरवर्साची ही जापसालदारकी आमी खोशेन सांबाळतात. केळीच्या पानार देवाक नैवेद्य दाखयतात. गायेक, कावळ्याक वाडी दवरतात. उमेदीन ल्हान, व्हड सगळे फराळ खातात. त्या दिसा कोणुच शीत जेविनात. सगळेच उपास धरतात. विठ्ठलाचो जयघोश करतात. विठ्ठल विठ्ठल, जय हरी विठ्ठलाच्या नादान सगलें वातावरण दुमदुमून वता.

सिध्दी तिळवे

9158200956