भांगरभूंय | प्रतिनिधी
भारताच्या राष्ट्रीय वाचन म्हयनो भारतभर 19 जून ते 18 जुलय मेरेन मनयतात. ते निमतान….
भारतांतलो राष्ट्रीय वाचन म्हयनो हो देशभरांत वाचनाची संस्कृताय वाडोवपा खातीरची एक म्हत्वाची वर्सुकी कार्यावळ. 19 जून ते 18 जुलय मेरेन ती मनयतात. साक्षरतायेचे आद्यप्रवर्तक पुथुवाई नारायण पनीकर, जांकां केरळांतले ग्रंथालय चळवळीचे जनक अशेंय म्हण्टात. राष्ट्रीय वाचन दीस मनयतना पी. एन. वैयक्तीक आनी समाजीक वाडीचें साधन म्हणून वाचनाक चालना दिवपाची तांची दृश्टी, आवड आनी अखंड वचनबद्धताय हांकां मान दिवन पनीकराची पुण्यतिथ पाळटात.
2004 वर्सा पी. एन. यादस्तीक शिक्को जारी केलो. प्रधानमंत्री नरेंद्र मोदी हांणी 2017 वर्सा राष्ट्रीय वाचन म्हयन्याचें उक्तावण केलें, भारतभर साक्षरतायेक चालना दिवपाक ताचें म्हत्व उक्तायलें. पी. एन. पनीकर (1 मार्च 1909 – 19 जून 1995) हे साक्षरतेची शक्त समजपी समाजसुदारक. तांणी 1926 वर्सा आपल्या गांवांत सनादानधर्म ग्रंथालय सुरू केलें. गांवगिऱ्या समाजाक पुस्तकां उपलब्ध करून दिलीं. पनीकर हांच्या यत्नांतल्यान तिरुविथमकूर ग्रंथशाळा संघ (त्रावणकोर लायब्ररी असोसिएशन) ही संस्था 1945 वर्सा स्थापन जाली आनी उपरांत राज्यांत जायतीं ग्रंथालयां स्थापन जालीं. ‘वैयिचु वालरुका’ (वाच आनी वाड) हो संदेश पातळावपा खातीर तांणी केल्ल्या समर्पणाक लागून केरळांतल्या साक्षरतेच्या दरांत बरीच सुदारणा जाली.
राष्ट्रीय वाचन म्हयनो फकत पी. एन. पनीकर हांच्या देशभरांतल्या वाचन संवयांक प्रोत्साहन दिवपा खातीरचे कृतीचो हो उलो. ह्या उत्सवाचे जायते मुखेल फायदे आसात: .
1. साक्षरतेचें प्रमाण वाडोवप : ल्हान पिराये सावन वाचपाक प्रोत्साहन दिल्यार साक्षरता सुदारपाक मदत जाता, जी शिक्षण आनी अर्थीक वाड करपाक म्हत्वाची आसा.
2. विमर्शीक विचारांक चालना दिवप : वाचनांतल्यान विमर्शीक विचारांची उदरगत जाता आनी लोकांक वेगवेगळ्या विचारांक तोंड दिवचें पडटा, जाका लागून चड म्हायती आशिल्लो समाज तयार जाता.
3. वाचन संस्कृताय वाडोवप : वाचपाची दिसपट्टी संवय शिकपाचो आनी गिन्यानाचो आजीवन मोग वाडयता.
4. डिजिटल फूट उणो करप : राष्ट्रीय वाचन म्हयनो डिजिटल माध्यमां वांगडाच पारंपारीक वाचनाक चालना दिता, स्क्रीन वेळ आनी वाचन वेळ हांचे मदीं समतोल दवरून बरे संज्ञानात्मक उदरगती खातीर.
ह्या महोत्सवांत सगळ्या पिरायेच्या लोकां मदीं वाचनाक चालना दिवपा खातीर तरेकवार कार्यावळींचो आस्पाव जाता. शिक्षणीक ग्रंथालयां, आनी समाजीक संघटना पुस्तक मेळावे, वाचन आव्हानां, कथा सांगपाचे सत्र, साहित्य महोत्सव घडोवन हाडटात. ह्या उपक्रमांक लागून वाचन मजेशीर आनी सुलभ जाता, जांकां पुस्तकां सोंपेंपणी मेळना तांकां लेगीत.
शिक्षक विद्यार्थ्यांक पुस्तक चर्चा, निबंद बरोवपाची सर्त, वाचन मॅरेथॉन हातूंत गुंतयतात. भौशीक वाचनालयांनी खाशेले कार्यक्रम आनी विस्तारीत वरां दितात. समुदाय पंगड भौशीक सुवातेर वाचन सत्रां घडोवन हाडटात, वाचपाचो आनंद सगळ्यां मेरेन पावता हाची खात्री करतात.
पुस्तकां वाचपी भुरग्यांक विशयाची बरी समजूत तयार जाता. जागतीक प्रस्न, संस्कृताय आनी भौगोलिक सुवातीं विशीं तांकां चड जाणविकाय जाता. ल्हान पिरायेचेर वाचपाक वंचित आशिल्ल्या भुरग्यांक फुडल्या जिवितांत अडचणी येतात. वाचन मन धारदार करता, मेंदवाचो व्यायाम करता आनी स्मृती सुदारताच, पूण सहानुभूती, शब्दसंग्रह, गिन्यान वाडयता, कल्पनेक स्पार्क दिता, एकाग्रताय सुदारता आनी बरोवपाची कुशळटाय वाडटा. एकंदरीत वाचन शिकप, सृजनशीलताय आनी वैयक्तीक उदरगती खातीर मर्यादे बगर संदी उगडटा, ताचो व्यक्ती आनी समाजाचेर सारकोच खोलायेन परिणाम जाता.
राष्ट्रीय वाचन म्हयनो प्रभावीपणान माध्यम मोहीम, सोशल मिडिया उपक्रम आनी भौशीक व्यक्तींक मान्यताय हांचे वरवीं वाचनाच्या म्हत्वा विशीं जागृताय करता. ह्या यत्नांनी वाचन हें वैयक्तीक वाड, शिक्षणीक यश आनी समाजीक प्रगती खातीर एक म्हत्वाची कुशळटाय म्हूण उजवाडाक हाडटात. भारतांतल्या राष्ट्रीय वाचन म्हयन्यांत साक्षरता आनी शिकप वाडोवपा खातीर जावपी यत्न म्हत्वाचें. वाचनाची परब मनयतना आमी आमच्या भूतकाळाक मान दितातच, पूण आमच्या वर्तमानाक समृद्ध करतात आनी उजवाडाचो फुडार बांदतात.
मनाली एस आचार्य
सेंट जोसेफ वाज कॉलेज
कुठ्ठाळी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
