भांगरभूंय | प्रतिनिधी
पणजी, प्रतिनिधी : मेरशे एके बायलेक दोगा चोरांनी भांगर पॉलीश करून दितां अशें सांगून पावणे दोन लाख रुपयांची तोपी घाली. ही घडणूक शेनवारा दनपरां घडली. ह्या प्रकरणांत आदलें गोंयच्या पुलिसांनी विक्रम भगत (३७, दिल्ली) आनी मोहम्मद फिरोझ (३१, बिहार) ह्या दोगांक अटक केल्या.
पोरणें गोंय पुलिसांनी दिल्ले म्हायती प्रमाण, शेनवार २३ डिसेंबराक दनपरां सुमार १ वरांचेर ही घडणूक घडली. कुंभारवाडो – मेरशेचे रिवणकर इमारतींत रावपी रतना शिरसांगी हांणी ही कागाळ दाखल केल्या. शेनवारा दोग दुबावीत तांच्या घरा आयले. त्या दोगांयनी हे बायलेक आयदणां नितळ करून दितां अशें सांगलें. उपरांत ते बायलेन तीं दिलीं. आयदणां चकचकीत केले उपरांत भांगराच्यो वस्ती पॉलीश करता अशें सांगलें. तांचेर विस्वास दवरून हे बायलेन गळ्यांतलें मंगलसूत्र काडून तांकां पॉलीश करपाक दिलें. तशेंच तिणें पॉलीश करपा खातीर एक भांगराची सरपळीय तांचे कडेन दिली.
मजगतीं दुबावितांनी मंगळसूत्र एका डब्यांत घालून तिचे कडेन दिलें. तेन्ना मंगळसुत्राचें वजन उणें जाल्ल्याचें तिका कळून आयलें आनी तिका दुबाव मारलो. ते प्रमाण तिणें दुबाविताक जाप विचारली तेन्ना दुबावितान तिच्या हातांत भांगराची सरपळी ओडून थंयच्यान पळ्ळे. उपरांत कागाळदारान बोवाळ केल्या उपरांत थळावे थंय एकठांय जाले आनी तांणी एकल्याक धरलो. उपरांत हे चोरयेची म्हायती पोरणें गोंय पुलीस स्टेशनांत दिली. पुलिसांनी येवन एका दुबाविताक ताब्यांत घेतलो. हे विशीं कागाळदारान दुबावितांनी १.७० लाख रुपयांचें भांगर चोरिल्ल्याचें कागाळींत म्हणलां.
हे विशीं पुलीस निरीक्षक योगेश सावंत हांच्या मार्गदर्शना खाला बायल उपनिरीक्षक लॉरिन सिक्वेरा हांणी दुबावीत विक्रम भगत आनी मोहम्मद फिरोझ ह्या दोगांय आड गुन्यांव दाखल करून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
