भांगरभूंय | प्रतिनिधी
राज्य बाल हक्क संरक्षण आयोगाची शिफारस
पणजी ः भुरग्यांचें संरक्षण (पॉक्सो) कायदो २०१२ खाला लिंगीक गुन्यांवांचो निवाडो बेगीन करपा खातीर गोंय राज्य बाल हक्क संरक्षण आयोगान (गोंय एससीपीसीआर) दक्षीण गोंया खातीर खाशेलें जलद गती न्यायालय (एफटीसी) तयार करपाची शिफारस केल्या. गोंय एससीपीसीआरचे अध्यक्ष पीटर एफ. बोर्जीस हांणी कायदो आनी न्यायवेवस्था मंत्री आलेक्स सिक्वेरा हांची भेट घेवन हाचेर चर्चा केली.
पॉक्सो कायदो, २०१२ च्या कलम ४४ आनी पॉक्सो नेम २०२० च्या नेम १२ वरवीं सक्तीचें केल्लें गोंय एससीपीसीआर पॉक्सो कायद्याच्या अंमलबजावणी स्थितीचेर सतर्कतायेन लक्ष दवरपाची म्हत्वाची जापसालदारकी घेता. गोंय एससीपीसीआर पॉक्सो कायद्याच्या अंमलबजावणी स्थितीचें सर्वसमावेशक मुल्यांकन करपाक सक्रीय आसा. हातूंत ताच्या तरतुदींची बारीकसाणेन छाननी, तपास प्रक्रिया, खटल्याची कार्यवाही आनी पिडेस्तांक आदार सेवांची सुलभतायेचो आसपाव आसा. देखरेखी पयलीं वचून गोंय एससीपीसीआर सरकाराक शिफारशी दिवन मुखेल सल्लागार भुमिका करता.
केंद्रीय मंत्रीमंडळान हालींच जलद गती विशेश न्यायालयाक (एफटीएससी) १ एप्रील २०२३ सावन ३१ मार्च २०२६ मेरेन मुजतवाड केल्ल्यान बलात्काराची प्रकरणां रोखडींच सोडोवपा खातीर जलद गती न्यायालय येवजण आनी बलात्कार आनी लैंगीक गुन्यांवा आड भुरग्यांचें संरक्षण (पॉक्सो) कायदो ह्या येवजणे कडेन सुसंगत आसा जाका लागून गोंय राज्या खातीर दोन एफटीएससी न्यायालयांत मंजूर केल्यांत. गोंय एससीपीसीआर दक्षीण गोंय जिल्ल्यांत अतिरिक्त पॉक्सो जलद गती न्यायालय स्थापन करपाची खर शिफारस करता.
गोंय एससीपीसीआरान फुडें म्हणलें, उत्तर गोंय जिल्ल्यांत १०० वयर पॉक्सो प्रकरणांचें वेवस्थापन करपी सध्याचो एफटीसी ताकतिकेन आनी कार्यक्षम चांचण्यो करपाची तांक वाडयता. दक्षीण गोंयांत न्यायालयाची स्थापणूक केल्यार हो भार पयस जातलो, वेळार न्याय मेळटलो. भुरग्यां आड जावपी लैंगीक गुन्यांवांचीं सगळीं प्रकरणां पॉक्सो न्यायालयांत हस्तांतरीत करपाची गोंयांतल्या मुंबय उच्च न्यायालयान हालींच एक आदेश जारी केला.
दक्षीण गोंयच्या गांवगिर्या आनी दुर्गम वाठारां सयत विंगड विंगड भुगोलीक परिस्थितीक लागून उत्तर गोंयांतल्या सद्याच्या एफटीसींत प्रवेश करपा खातीर पिडेस्तांक बरीच आडखळ आयल्या. दक्षीण गोंयांत न्यायालयाची स्थापणूक केल्यार भुगोलीक सुलभताय जातली आनी पिडेस्तांक जलद न्यायाच्या हक्काचे रक्षण जातलें.
हे येवजणेंत १०० परस चड प्रकरणां आशिल्ल्या जिल्ल्यांत खाशेल्या पॉक्सो न्यायालयांची सक्ती केल्या. दक्षीण गोंय जिल्लो हो निकश पुराय करता, ताका लागून दुय्यम पिडीत जावपाचो धोको पयस करपा खातीर अतिरिक्त न्यायालयाची स्थापणूक करप गरजेचें.
मंजूर जाल्ल्या दोन न्यायालयां मदले फकत एकूच न्यायालय स्थापन केल्ल्यान हो अनुशेष पयस करपा खातीर आनी वेळार न्याय मेळोवन दिवपा खातीर दक्षीण गोंयच्या अतिरिक्त एफटीसी स्थापन करप, बेगोबेग न्याय मेळोवन दिवप आनी आडखळील्ल्या खटल्यां कडेन संबंदीत आघात कमी करप म्हत्वाचें आसा, अशें गोंय एससीपीसीआरान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
