भांगरभूंय | प्रतिनिधी
मंत्री आलेक्स सिकेरा हांची अधिकाऱ्यांक सुचोवणी
मडगांव, प्रतिनिधी : दक्षीण गोंयच्या नागरिकांनी बांदकाम नियमीत करपा खातीर अर्ज केल्यात. आडखळून उरिल्ले अर्ज सोडोवपा खातीर कागदपत्रां सादर करपा वांगडा हेर प्रक्रिया सुटसुटीत करच्यो. तशेंच लोकांक आडखळी येवच्यो न्हय म्हणून जतनाय घेवची. जांचीं कागदपत्रां योग्य आसात तांचे प्रस्न सोडोवचे अश्यो सुचवण्यो जिल्हाधिकारी कार्यालयांतल्या अधिकार्यांक दिल्यात, अशें मंत्री आलेक्स सिक्वेरा हांणी सांगलें.
दक्षीण गोंय जिल्होधिकारी कार्यालयांत मंत्री आलेक्स सिक्वेरा दर शुक्रारा लोकांच्यो समस्या जाणून घेतात. शुक्रारा जिल्होधिकारी कार्यालयांतले बसके वेळार दक्षीण गोंय जिल्होधिकारी अश्विन चंद्रू, उपजिल्होधिकारी श्रीनेत कोठावळे, उपजिल्होधिकारी उदय प्रभूदेसाय हांचे वांगडा भौशीक बांदकाम खातें, नगरनियोजन खात्याचे अधिकारी हाजीर आशिल्ले.
मंत्री सिक्वेरा हांणी सीआरझेड तशेंच कोमुनिदाद जाग्यां वयलीं बांदकामां नेमान करपा खातीर अर्ज आडखळून उरिल्ल्याचें विचारतना लोकांक त्रास जावचे ना हाची जतनाय घेवची. सगळ्या खात्यांनी एकामेका कडेन सहकार्य करून कामां करपाच्यो सुचवण्यो तांणी केल्यो.
कुळ मुंडकार प्रकरणां निकालांत हाडपा खातीर मुख्यमंत्र्यान शेनवारा आदेश दिल्यात. राज्यांत सुमार दोन हजार प्रकरणां आडखळून उरल्यांत अशी म्हायत आसा. सारको आंकडो आमचे कडेन ना. नव्या म्हामार्गा वयल्या सिग्नलां विशीं अधिकार्यांक सुचवण्यो दिवन तें सिग्नल सुरु करपाक सांगलें. दक्षीण गोंय जिल्हो हॉस्पिटलांतल्या अपग्रेडशना विशीं भलायकी मंत्र्या कडल्यान उपाय करतात, अशेंय मंत्री सिक्वेरा हांणी स्पश्ट केलें.
नोंदणे खातीर मुजतवाड
ल्हान वेपार्यांक व्हॅल्यू ऍडेड टॅक्स कायद्या खाला नोंदणी खातीरची मुजत बिरेस्तारा पुराय जाल्ली. मुजती उपरांत तांकां २५ हजार रुपयांचो दंड भरचें पडटलें आशिल्लें. हे विशींचो मुद्दो वेपार्यांनी मांडिल्लो. ते प्रमाण मुख्यमंत्री प्रमोद सावंत हांचे कडेन चर्चा केली. मुख्यमंत्री बारीक वेपार्यां खातीर नोंदणी करपाचे प्रक्रिये खातीर आनीक म्हयनोभर दिला अशें स्पश्ट केलें. ताका लागून वेपार्यांक नोंदणी खातीर एका म्हयन्याचो काळ मेळटलो आनी तांकां दंडूय भरचें पडचें ना, अशें मंत्री सिक्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
