भांगरभूंय | प्रतिनिधी
खासदारांच्या निलंबनाचो इंडिया आाघाडीन केलो निशेद
पणजी, प्रतिनिधी : हुकुमशाय मानपी भाजप सरकाराच्या काळात लोकशाय धोक्यात आयल्या. केंद्रातल्या तशेच राज्यातल्या भाजप सरकाराक लोकांच्या प्रस्नांविशीं कसलीच संवेदना उरुंक ना, अशी टीका विरोधी पक्ष फुडारी युरी आलेमाव हांणी केली.
इंडिया आाघाडींतल्या घटक पक्षांनी पणजे आझाद मैदानाचेर आयज सकाळी सरकारा आड निदर्शनां केलीं. संसदेंतल्यान 142 खासदारांक निलंबित करपाच्या घडणुकेचो इंडिया आघाडीन निशेद केलो. प्रदेश काँग्रेस अध्यक्ष अमित पाटकार, विरोधी पक्ष फुडारी युरी आलेमाव, आमदार कार्लोस फेरेरा, आमदार एल्टन डिकोस्ता हाजीर आशिल्ले. राष्ट्रवादी काँग्रेसीचे प्रदेश अध्यक्ष जुजे फिलीप डिसोझा, आम आदमी पार्टीचे फुडारी अॅड. अमित पालेकार , शिवसेनेचे जितेश कामत, तृणमुल काँग्रेसीचे तनोज अडवलपालकार, महिला काँग्रेस अध्यक्ष बीना नायक हांचीय उपस्थिती आशिल्ली.
भारतीय जनता पक्षान बिरेस्तारा सकाळी राहुल गांधींचो बावटो लासलो. हाचो प्रदेश काँग्रेस अध्यक्ष अमित पाटकार हांणी निशेद केलो.
संसदेच्या सुरक्षेचो भंग करीत दोगा जाणांनी संसदेत प्रवेश केलो. ह्या आरोपीक पास दिवपी भाजप खासदारांचेर कारवाय करपाची मागणी आमदार कार्लोस फेरेरा हांणी केली.
इंडिया ब्लॉक आाघाडी स्थापन जाल्ल्यान भारतीय जनता पक्ष आघाडीत खवदळ निर्माण जाल्या. इंडिया ब्लॉक आाघाडी भाजप आघाडीचो पराभव करतली, अशें जुजे फिलीप डिसोझा हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
