भांगरभूंय | प्रतिनिधी
म्हापशें, प्रतिनिधी: नातलां आनी नवें वर्स मनोवपाक जायते पर्यटक गोंयांत येतात. तांचो राबितो चडशो दर्यादेगां लागसारा आसता. कळंगुटे काल एक चोरयेची घडणूक घडली. गोंयचे भोंवडेर आशिल्ल्या एका पर्यटकाच्या गळ्यांतल्यान सरपळी मारिल्ल्याच्या प्रकरणांत कळंगुटे पुलिसांनी चार जाणांक अटक केली.
ह्या प्रकरणांत मोर्सालीन सैदूल मुल्ला (२०), राजू शंकर मुल्ला (१९), अख्तर मोलिया अली (२४) आनी राकिफूल सैदूल मंडाल (१९) हांकां अटक केल्या. हे चौगूय जाण अस्तंत बंगालचे.
हे विशीं चड म्हायती प्रमाण, कागाळदार संतोष एच. हो मुळचो कर्नाटकचो. तो गोंयचे भोंवडेर आयिल्लो. तो कळंगुटेच्या लिटल गोवा रेस्टोरंटा कडेन राविल्ले कडेन वयर नांवां दिल्ले चवगूय चोर थंय आयले आनी कागाळदारा कडल्यान तांणी मोबायल फोन आनी १९ हजार रुपया काडून घेतले. तशेंच ताच्या गळ्यांत आशिल्ल्यो दोन भांगराच्यो चेनी मारून ते थंयच्या पळ्ळे. ह्यो सरपळ्यो सुमार १,९५,००० रुपयांच्यो आशिल्ल्यो.
कागाळदानार त्या चारूय चोरांची कागाळ कळंगुटे पुलीस स्टेशनांत केली. पुलीस उपनिरीक्षक अक्षय पार्सेकार हांच्या फुडारपणा खाला त्या चोरांक धरपा खातीर पंगड तयार केले. पुलीस पंगडांनी उपरांत खबर्यां कडल्यान चोरांचीं नांवां मेळयलीं. तांची चवकशी केली तेन्ना त्या चवगांनीय चोरी केल्ल्याचें कबूल केलें. पुलिसांनी तांकां अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
